MP Avalia Progresu no Dezafiu 2018 no Perspetiva Servisu 2019

0
88
Prokuradór Jerál Repúblika, José da Costa Ximenes. Imajen Egas Cristovão

DILI (TATOLI)-Ministériu Públiku (MP) realiza retiru anuál hodi avalia progresu, dezafiu iha tinan 2018 no perspetiva Ministériu Públiku nian ba tinan 2019.

Retiru anuál ne’e, hala’o loron rua iha Otel JL. Vila, Fatuhada Díli, hahú ohin no ramata aban, inklui sábadu sei hala’o mós asaun sosiál ida ba Uma Mahon Casa Vida, ne’ebé lokaliza iha Bidau-Lecidere, Díli.

“Iha ne’e ita sei debate ko’alia oituan saida mak kuadru Ministériu Públiku halo ona; di’ak, ita kontinua reforsa, hanesan pontu forte, pozitivu, ita kontinua manten ba 2019, i saida mak hanesan pontu fraku, dezafiu saida mak ita iha i halo planu para bele hadi’a di’ak liután serbisu iha 2019,” informa Prokuradór Jerál Repúblika, José da Costa Ximenes ba jornalista sira, iha marjen retiru ne’e.

Prokuradór Jerál José da Costa Ximenes mós haktuir, durante nia intervensaun, iha abertura retiru anuál ne’e katak iha pontu tolu mak akresenta, ida, kona-ba difikuldade ne’ebé Ministériu Públiku hasoru iha 2018. Katak, hahú husi janeiru to’o outurbu 2018, ita depende de’it ba orsamentu duodésimu.

Ho depedénsia orsamentu duodésimu, Ministériu labele ezekuta ninia programa, la konsege estabelese infra-estrutura ba majistradu sira, la konsege hola ekipamentu sira suporta majistradu sira, ofisiál justisa sira, la konsege implementa programa ba reforsa, kapasitasaun rekursu umanu.

Pontu seluk mak kona-ba oinsa hadi’a estatutu Ministériu Públiku. Hadi’a para bele hatuur didi’ak, aban bainrua perspetiva ba oin, Ministériu ba oin hanusa? Agora dadauk ita prepara tiha ona esbosu ida, define parte tolu; parte ida kona-ba orgánika Ministériu públiku, parte ida dedika ba estatutu Majistradu nian nomós parte dispozisaun finál, ne’e ko’alia oituan, karik Majistura primeira klase la iha, segunda klase la iha ne’e oinsá? Ne’e define hotu iha estatutu foun.

Ikus liu mak ko’alia kona-ba kestaun prosesuál. Primeiravez iha fim 2016, prosesu ne’e to’o 220 itál, 2017 sa’e 2500, entaun prosesu sa’e oituan. Iha 2018, agora analiza hela. Ba pontu sira ne’e, 2019 ko’alia kona-ba Prokuradória Jerál nia planu, serbisu inspesaun nia planu, diresaun administrasaun sira-nia planu.

“Prokuradór Distritál sira mós tenke aprezenta planu ida porque objetivu prinsipál husi justisa, ba ita-nia komunidade mak servisu ida ne’ebé efisiente no kualidade. Servisu justisa ida ne’ebé efisiente no kualidade mak importante,” akresenta Prokuradór Jerál, José da Costa.

Nia esplika, ita-nia atendimentu ba komunidade ba iha administrasaun justisa, ita hakarak kazu hotu ne’ebé mak mai iha Ministériu Públiku ne’e halo ho efisiente katak lalais, la presiza orsamentu barak, ajuda lalais, garante kualidade. “Ida ne’e mak ohin ha’u-nia hameno”.

Pontu ikus, Prokuradór Jerál Repúblika, José da Costa konfirma katak iha loron ikus husi retiru anuál ne’e, sábadu, sei halo atividade sosiál ida ba Uma Mahon, Casa Vida, tanba konsidera katak sira ne’ebé iha prizaun, fim-do-ano, ema barak vizita, fó korajen ba sira para bele sai di’ak fila fali iha komunidade bainhira loron ida sai husi ona prizaun.

“Vítima sira ba violénsia seksuál, abuzu ba menór, sira ne’ebé iha hela Uma Mahon Casa Vida, se mak ba enkoraja sira? Entaun, ha’u dehan, ita tau hamutuk buat ruma, para ba vizita iha sábadu,” informa Prokuradór Jerál.

Prokuradór José da Costa Ximenes informa tan katak Ministériu Públiku halo retiru anuál ne’e maioria husi prokuradór sira iha teritóriu laran partisipa iha retiru ne’e ezetu sira ne’ebé tuir hela servisu tornu.

“Tribunál sira funsiona, dalaruma ami mai fokus hotu iha ne’e, dalaruma  dehan ami la tuir, partisipa iha julgamentu, orsida sira halo fali keixa ka kontra ninia Majistradu sira. Tanba ida ne’e, tinan ida ne’e ita organiza, nafatin funsiona serbisu. Díli ema na’in rua mak garante serbisu tornu; ne’e sira ne’ebé bele ba julgamentu, atende kazu urjente sira. Baucau iha ida, Suai iha ida. Oe-Cusse como sira Prokuradór Distritál ida de’it, entaun organiza ho tribunál, iha kazu urjente ruma nia bele fila,” nia esplika.

Iha retiru anuál Ministériu Públiku nian ba loron dahuluk, ohin (17/01) aprezenta kona-ba servisu administrasaun jerál, ne’ebé mak aprezenta husi Diretora Jerál Prokuradória Jerál Repúblika (PJR), Ana Maria Pereira de Carvalho.

Aprezentasaun Servisu Kontesioju Estadu, sei aprezenta husi Pascasio de Rosa Alves, aprezentasaun Servisu Gabinete Korupsaun, aprezenta husi Adjuntu PJR, Alfonso Lopes.

Ba loron daruak nian, sexta (18/01) aprezentasaun servisu husi Prokuradória Distritál Díli, ne’ebé mak sei aprezenta husi Prokuradór Jerál Distritál Díli, Jacinto Babo.

Aprezentasaun servisu husi Prokuradória Distritál Baucau, sei aprezenta husi Prokuradora Distritál Baucau, Remiza de Fátima. Aprezentasaun servisu husi Prokuradória Distritál Suai, sei aprezenta husi Prokuradór Distritál Suai, José Elo.

Inklui, aprezentasaun servisu husi Prokuradória Distritál Oe-Cusse, sei aprezenta husi Prokuradór Mateus Nessi.

Hafoin aprezentasaun husi Prokuradór Distritál sira hotu, sei foti konkluzaun direta husi Prokuradór Jerál Repúblika, José da Costa Ximenes no bele fasilita ba públiku sira bele hatene.

Jornalista: Rafy Belo

Editór : Manuel Pinto

HUSIK IDA HATÁN