KM Aprova Duodesimu ba Fulan Janeiru

0
410
Foto GPM

DILI (TATOLI)—Konsellu Ministru (KM), Kuarta ne’e iha Palásiu Governu realiza reuniaun ordináriu dahuluk iha inisiu fulan Janeiru 2019. Rezultadu reuniaun ne’e, KM aprova duodesimu ba fulan Janeiru nian.

Tuir komunikadu ne’ebé mak Tatoli asesu, ohin (09/01) haktuir katak; Primeiru-Ministru Taur Matan Ruak, Kuarta-feira ne’e iha Palásiu Governu, prezide reuniaun ordinária dahuluk Konsellu Ministru nian iha insiu fulan Janeiru 2019, ho ajenda sira hanesan;
Konsellu Ministru hahú ho rona aprezentasaun hosi SEPFOPE, proposta kona-ba Memorandu Entendimentu entre Governu Repúblika Demokrátika Timor-Leste ho Governu Australia ba apoiu iha Programa Serbisu Temporáriu nian iha Australia. Objetivu hosi memorandu ne’e, atu define preparativu sira hodi fasilita asesu ba sidadaun sira atu asesu tama ba merkadu traballu temporáriu tuir Programa Traballadór Timoroan iha indústria ne’ebé deskreve ona iha akordu implementasaun. Nune’e Konsellu Ministru fó kompeténsia ba Sekretáriu Estadu ba Formasaun Empregu atu hala’o asinatura kona-ba memorandu ne’e rasik.

Konsellu Ministru aprova Dekretu Governu, ne’ebé aprezenta hosi Ministra Finansas Interinu Sara Lobo, kona-ba Ezekusaun Orsamental Rejime Duodesimal, tuir Lei No.12/2009, loron 21 fulan Outubru, ne’ebé mak altera ho Lei No. 4/2013/III loron 7 fulan Agostu, kona-ba Orsamentu no Jestaun Finanseira (doravante LOGF), ne’ebé prevee iha artigu 13o, se kazu Orsamentu Jeral Estadu la tama iha vigor iha inisiu tinan fiskál, ne’ebé mak akontese hela, aplikasaun rejime duodesimal, ho modo atu permite atividade normal Estadu nian.

Ministru Reforma Lejizlativa no Asuntu Parlamentar nian (MRLAP), Fidelis Manuel Leite Magalhães, halo aprezentasaun kona-ba Nota Konseptuais tolu mak hanesan; Inovasaun Administrativa, Reforma Judisiária no Reforma Lejizlativa.

Governu Konstitusionál da VIII promove reforma no moderniza administrasaun públika ida ne’ebé simples, efisiente no fiável no buka atu garantia kondisaun di’ak ba sidadaun sira hotu. Setór justisa ida ne’ebé natón no efikás atu promove investimentu nasionál no estranjeiru, ho nune’e kondisaun di’ak ba sidadaun sira-nia moris, nune’e bele fasilita kumprimentu hosi objetivu konstitusionais ba kriasaun sosiedade ida ne’ebé justa, promosaun ba igualdade jéneru no kombate korrupsaun no ba defeza interese patrimóniu sidadaun nian.

Konsellu Ministru aprova mós Dekretu Governu kona-ba renumerasaun ba Órgaun Institutu Nasional Seguransa Sosiál (INSS) ne’ebé mak aprezenta hosi Ministra Solidariedade Sosiál no Inkluzaun, Armanda Berta.

Konsellu Ministru aprova mós Rezolusaun kona-ba ezonerasaun ba atuál Prezidente Konsellu Administrasaun RTTL.EP no halo nomeasaun foun ba Sr. Francisco da Silva Gari (Eis Diretór TLMDC) nu’udar Prezidente Konsellu Administrasaun RTTL.EP foun, tuir proposta hosi Sekretáriu Estadu Komunikasaun Sosiál.

Konsellu Ministru rona mós aprezentasaun hosi Reprezentante Espesiál ba Guiné-Bissau, Tomas do Rosario Cabral kona-ba relatóriu misaun apoiu tékniku ba eleisaun jerál iha Guiné-Bissau, ne’ebé mak remata ona iha loron 18 fulan Novembru 2018.

Ikus liu Konsellu Ministru aprova Orgánika hosi Ministériu Administrasaun Estatál (MAE), hanesan departamentu Governamental ne’ebé responsavel ba konsepsaun, ezekusaun, koordenasaun no avaliasaun polítika, ba area podér lokál no desentralizasaun Administrativa. Apoiu organizasaun komunitária, promosaun dezenvolvimentu lokál ba organizasaun no ezekusaun ba prosesu eleitorál no referendáriu, promosaun hijene no organizasaun urbana no mós klasifikasaun no konservasaun dokumentu ofisiál ho valor istóriku.

Jornalista : Zezito Silva

Editór : Manuel Pinto

HUSIK IDA HATÁN