iklan

INTERNASIONÁL

Governu Sei Fó Onra Ba Veteranu Ne’ebé Involve Iha Misaun INTERFET

Governu Sei Fó Onra Ba Veteranu Ne’ebé Involve Iha Misaun INTERFET

Ministru Prezidensia Konsellu Ministru, Hermenegildo Augusto Cabral Pereira.

DILI, (TATOLI) – Ministru Prezidensia Konsellu Ministru, Hermenegildo Augusto Cabral Pereira, hatete governu konstituisaun da-ualu iha ona planu fó onra ba forsa veteranu Austrália no nasaun sira ne’ebé involve ona misaun forsa internasionál ba Timor-Leste, (INTERFET-sigla inglés) durante komemorasaun loron konsulta populár 30 agostu tinan ne’e.

“Konsellu ko’alia mós kona-ba konsulta populár, ita boot sira hatene tinan 2019 tama ona tinan 20 loron konsulta populár, ligasaun mós ho loron INTERFET 20 setembru tinan ida ne’e veteranu sira ne’ebé involve iha INTERFET sei mai hotu Timor-Leste mai para simu onra hosi Estadu nomós hatudu solidaridade no reforsa relasaun bilaterál entre povu Timor-Leste, povu Austrália, governu no governu no Estadu no Estadu”, katak nia ba jornalista sira iha Palásiu Governu, ohin.

Nia haktuir diskusaun ne’e seidauk iha desizaun ikus, maibé fó hela kompeténsia ba Ministru Kombatente no Libertasaun Nasionál en ezersísiu, atuál Sekretáriu Estadu Asuntu Kombatente Libertasaun Nasionál, Gil da Costa Monteiro ‘Oan Soru’, Ministru Defeza, Filomeno da Paixão de Jesus, no Ministru Negósiu Estranjeiru no Kooperasaun, Dionísio da Costa Babo Soares, trasa planu ida di’ak liután antes lori hikas ba KM hodi hetan aprovasaun.

Entretantu INTERFET to’o Timor iha loron 20 fulan-setembru 1999 lidera hosi Austrália bazeia ba rezolusaun Organizasaun Nasaun Naklibur sira (ONU-sigla inglés) atu asume responsabilidade ba estabilidade iha nasaun foun ne’e durante 1999 to’o 2000. Forsa ne’e komanda hosi Jenerál Peter Cosgrove.

Nasaun 22 maka hola parte iha misaun ne’e ho ninia forsa militár hamutuk rihun 11 kompostu hosi Austrália maka prepara kontijenti forsa ho numeru boot 5.500 no ekipamentu funu, Nova Zeláandia ho ninia forsa militár hamutuk 1.100 depois reforsa tan hosi Amérika, Bangladexe, Brazíl, Inglaterra, Filipina, Irlanda, Itália, Alemaña, Kanada, Kénia, Korea Súl, Malázia, Noruega, Pakistaun, Fransa, Portugal, Singapura no Tailándia.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!