iklan

POLÍTIKA

Governu Planeia Hanaruk Tan Kontratu Ho Kompañia ETO-SAKOM

Governu Planeia Hanaruk Tan Kontratu Ho Kompañia ETO-SAKOM

Ministru Obras Públikas, Salvador Soares dos Reis Pires. Imajen António Goncalves

DILI, (TATOLI) – Governu liuhosi enkontru Konsellu Ministru estraordináriu ohin halo diskusaun ba proposta hodi hanaruk tan kontratu ba kompañia Esperansa Timor Oan (ETO) no SAKOM hodi fornese kombustivel ba sentrál elétrika Hera no Betanu.

Ministru Obras Públikas, Salvador Soares dos Reis Pires, hateten marsu tinan ne’e kontratu tuan sei termina, tanba ne’e iha proposta ne’ebé aprezenta hanaruk to’o setembru tinan ne’e.

“Ami ko’alia atu estende tan sira nia kontratu, tanba atu loke konkursu foun ita presiza orsamentu jerál estadu ne’ebé propoin ona hodi hein prosesu promulgasaun hosi prezidente, tanba ne’e ami antesipa hela”, hateten ministru ba jornalista sira iha Palásiu Governu, hafoin sorumutu.

Bazea ba polítika governu, tenke halo preparsaun durante fulan neen hodi loke konkorsu ho kategoria internasionál, bainhira atu fornese mina ba sentrál EDTL HERA no Betanu.

“Pedidu ba konsellu ministru atu aprova para fó tempu ba ami atu halo preparasaun ba kontratu foun”, tenik.

Mesmu nune’e governu la konsege aprova proposta ne’e, tanba sei kontinua halo preparasaun ba baze legál balun hodi aprezenta hikas iha reuniaun kuarta semana ne’e.

Tuir kalkulasaun hosi EDTL, kompañia rua ne’e sei fornese tan mina litru milliaun 65 to’o setembru 2019.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!