Embaixadora Maria Helena Pires Hasoru Vise-SekJer ONU

0
252
Reprezentante Permanente Timor-Leste, Embaixadora Maria Helena Pires. Foto: ONU News

DILI, (TATOLI) – Reprezentante Permanente Timor-Leste iha Organizasaun Nasaun Unida (ONU), Embaixadora Maria Helena Pires, hala’o sorumutu ho Vise-Sekretariu Jerál ONU, Amina Mohammed, iha loron 9 janeiru 2019, iha Kuartel Jerál ONU.

Sorumutu ne’e parte rua ko’alia kona-ba asuntu importante hanesan kontribuisaun ba fundu Koordenadór Rezidente (Resident Coordinator), akreditasaun no importánsia husi misaun refere, aprezentasaun relatóriu Revizaun Nasionál Voluntária (Voluntary National Review) kona-ba implementasaun ajenda 2030 husi parte Timor-Leste ne’ebé tuir planu sei hala’o iha jullu 2019 iha Nova Iorke, no planu komemorasaun tinan 20 Konsulta Populár, ne’ebé sei hala’o iha agostu iha Dili.

Maria Helena Pires hato’o kooperasaun entre Timor-Leste ho Nasaun Unida to’o ohin loron la’o di’ak tebes. Durante ne’e TL sai mós nu’udar istória susesu ida ba ONU.

“Tanba ne’e, Timor-Leste kontinua fó importánsia ba kooperasaun di’ak ne’ebé iha no prontu nafatin atu hala’o nian papel ativu iha área multilaterál hodi kontribui ba pás no seguransa globál”, haktuir komunikadu Ministériu Negósiu Estranjeru no Kooperasaun (MNEK) husi Nova Iorke ba TATOLI, ohin.

Tuir komunikadu ne’e Reprezentante Permanente hato’o mós TL nia kompromisu atu kontribui ba fundu Koordenadór Rezidente iha prosesu hela no hein katak tempu badak TL sei konkretiza kompromisu ne’ebé iha.

Alende ne’e, Maria Helena Pires mós louva kolaborasaun Koordenadór Rezidente iha Dili no afirma TL sei kontinua servisu ho Koordenadór Rezidente atu bele hamutuk asegura prosesu implementasaun Objetivu Dezenvolvimentu Sustentável (ODS) 2030.

Tuir planu TL sei halo mós aprezentasaun kona-ba Revizaun Nasionál Voluntária ne’ebé sei hala’o iha fulan-jullu tinan ne’e iha Nova Iorke, no prosesu ne’e rasik oras ne’e lidera husi Gabinete Primeiru-Ministru RDTL.

Iha biban ne’e, Maria Helena Pires katak TL sei komemora tinan 20 Konsulta Populár, ne’ebé tuir planu sei hala’o iha agostu 2019, iha Dili.

Ho konsiderasaun ba papel Nasaun Unida nian ne’ebé importante tebes iha prosesu ne’e, Timor-Leste hein katak Sekretariu-Jerál Nasaun Unida bele atende eventu istóriku ne’e.

Vise Sekretáriu-Jerál Nasaun Unida, Amina Mohammed, apresia tebes.

Tuir komunikadu ne’e ho informasaun hirak ne’ebé hato’o no espressa mós gratidaun ba TL nia papel no kontribuisaun hahú husi Painel Altu Nível pesoa eminente sira ba Ajenda Dezenvolvimentu Pos-2015 (High Level Panel of eminent persons on the Post – 2015 Development Agenda).

Vise Sekretáriu-Jerál akresenta TL nian papel iha prosesu ne’e importante tebes tanba fó apoiu maka’as ba formatu husi objetivu globál hirak ne’ebé ohin loron komunidade internasionál tenta atu implementa tuir ajenda 2030.

Alende ne’e, Vise Sekretariu-Jerál mós hato’o agradesimentu ba TL nian kontribuisaun ba fundu Koordenadór Rezidente.

Asaun ida ne’e fó sinál di’ak tebes ba estadu membru sira seluk no sai nu’udar referénsia di’ak ida atu habelar liután baze husi fundu ne’e, hodi hetan kontribuisaun husi Estadu membru sira seluk.

Vise Sekretariu-Jeral elojia Gabinete PM nia lideransa no esforsu hodi kondus prosesu Revizaun Nasionál Voluntária.

Nia haktuir liután importante tebes atu uza ida ne’e atu bele hare’e nasaun ida nia esforsu iha prosesu implementasaun objetivu hirak globál nian.

Eventu sira hanesan Revizaun Nasionál Voluntária iha Fórum Polítiku Alto Nível (HLPF) no eventu sira seluk Asembleia Jerál nian sei sai mós nu’udar referénsia hodi haree, ba oin, oinsa nasaun no rejiaun sira transforma aan tuir implementasaun ajenda 2030.

Vise Sekretariu-Jerál afirma ninia Gabinete oras ne’e konsentra hela mós ba mekanismu Kuadru Assisténsia ba Dezenvolvimentu Nasaun Unida (UNDAF) atu bele hatan ba pais idaidak nian nesesidade.

Alende ko’alia kona-ba asuntu hirak ne’e, Reprezentante Permanente Timor-Leste no Vise Sekretariu-Jerál Nasaun Unida troka mós hanoin kona-ba partisipasaun feto iha sistema Nasaun Unida, rejiaun no iha rai idaidak.

Parte rua konkorda esforsu tenke kontinua halo no presija halo konstantamente, nune’e bele realiza balansu jéneru, ne’ebé Nasaun Unida apela ba mundu atu halo.

Jornalista: Rafy Belo

Editora: Rita Almeida

HUSIK IDA HATÁN