Ema Hotu Hein no Preokupa Ho OJE 2019

0
529
Bispu Dioseze Dili, Don Virgílio do Carmo, ko’alia ba jornalista sira iha Palásiu Prezidente Nicolau Lobato, kuarta ne’e, bainhira hamutuk ho reprezentante relojiaun sira seluk hala’o inkontru ho Xefe Estadu Lú Olo. Imajen Ajénsia Tatoli/Xisto Freitas

DILI (TATOLI)—Bispu Dioseze Dili, Don Virgílio do Carmo, hateten orsamentu jerál Estadu (OJE) 2019 ne’e sertamente ema hotu hein hela ka presiza ba povu ida ne’e nia di’ak, maibé preokupa ho alokasaun orsamentu ba área tolu ne’ebé importante.

Nia esplika, área tolu ne’ebé oras ne’e sai sidadaun sira nia preokupasaun maka edukasaun, katak Goveru harii eskola barak maibé dala barak sei rona halerik kona-ba edukasaun. Segundu, halerik nafatin kona-ba dezempregu, katak dezempregu iha rai laran boot teb-tebes. Ne’e duni, dalan ida atu redús dezempregu maka agrikultura no, terseiru, saúde mós dala barak sai hanesan sidadaun sira nia preokupasaun ligadu ho fasilidade saúde ne’ebé sei menus.

“Tanba ne’e maka bainhira haree ba orsamentu ne’ebé aloka ba área tolu liu-liu ba área agrikultura ne’ebé ho montante ki’ik, ida ne’e fásil liu ba ita sosa foos duké halo natar,” Don Virgílio ba jornalista sira iha Palásiu Prezidente Nicolau Lobato, Bairru Pité, kuarta ne’e, bainhira hamutuk ho Don Basílio do Nascimento nomós reprezentante relijiaun sira seluk hanesan Asembleia de Deus, Protestante, Musulmanu no Budha, hala’o soru-mutu ho Prezidente Repúblika, Francisco Guterres Lú Olo, relasiona ho OJE 2019.

Líder Igreja Katólika ne’e afirma katak relasiona ho montante OJE ba tinan ida ne’e ne’ebé ás teb-tebes, depende ba nai ulun (Xefe Estadu) atu tetu didi’ak nune’e bele hatán ba povu ninia di’ak ka tenke iha ekilibriu ida ba buat ne’ebé ita iha no buat ne’ebé ita gastu.

Bispu haktuir, durante inkontru ho Prezidente Repúblika, sira la ko’alia veta ka la veta OJE maibé buat ne’ebé sira sujere maka oinsá orsamentu ne’e bele ajuda fó benefísiu ba povu.

Iha biban ne’e, Prezidente Konsellu Nasionál Izlamika Timor-Leste, Haji Ahmad Ali Al-Ayyubi, tenik direitu Prezidente Repúblika nian atu veta ka la veta, maibé sira nia prezensa somente mai konsulta oinsá maka dezenvolve Timor ne’ebé di’ak liu ligadu ho OJE 2019.

“Ami la ko’alia kona-ba problema veta ka la veta. Prezidente hakarak hetan opiniaun ka sujestaun ne’ebé di’ak para bele dezenvolve Timor ne’ebé di’ak liu. Sujestaun hosi ami (Musulmanu) katak orsamentu ne’ebé boot hanesan ne’e ita labele depende de’it rezultadu hosi minarai maibé Governu presiza harii indústria ruma hanesan Fábrika Sugar, produs rasik fós no fábrika sira seluk atu hakotu dependénsia ba importasaun,” nia esplika.

Jornalista: Xisto Freitas

Editór : Manuel Pinto

HUSIK IDA HATÁN