Ajénsia TATOLI ho JICA Ko’alia Posibilidade Kooperasaun

0
118
Enkontru entre Prezidente Ajénsia TATOLI, IP, José da Costa ho Diretór Ezekutivu JICA, Nagaishi Masafumi. Foto TATOLI: Egas Cristovão

DILI, (TATOLI) – Prezidente Ezekutivu ajénsia notísia TATOLI, IP, José da Costa, enkontru ho Diretór Ezekutivu Ajénsia Kooperasaun Internasionál hosi Japaun (JICA-sigla inglés) iha Timor-Leste, Nagaishi Masafumi, hodi ko’alia kona-ba posibilidade kolabora hamutuk, sai parseiru mútua iha prezente no futuru.

Diretór Ezekutivu JICA, Nagaishi Masafumi, haktuir posibilidade rua ne’ebé mak JICA bele halo hodi apoia tuir nesesidade no prioridade ne’ebé mak ajénsia estadu Timor-Leste ne’e presiza.

“Posibilidade ba iha ita-boot sira-nia ajénsia mak haree oinsá voluntáriu japonés sira, iha área espesífika, bele mós fó apoiu. Bele husu ba iha sesaun voluntáriu JICA nian. Seluk mak oinsá halo treinamentu husi Japaun, durante fulan rua ka tolu”, hateten Nagaishi Masafumi durante enkontru iha edifísiu JICA, Avenida Lurumata, lorokraik ne’e.

Iha fatin hanesan, Ezekutivu TATOLI, IP, José da Costa, akresenta posibilidade tolu nu’udar pedidu ba JICA, oinsá bele koopera.

Posibilidade sira ne’e mak parseria serbisu, oportunidade teknikál nomós formasaun ba rekursu umanu ka profisionál komunikasaun sosiál sira.

“Atualmente jornalista na’in hitu mak serbisu iha ajénsia TATOLI maibé iha futuru sei buka tan jornalista sira hodi halo kobertura ba iha país laran tomak envolve mós parseiru serbisu sira hodi publika iha ami-nia portál. Maibé, bazikamente sei dook husi objetivu loloos ajénsia notisioza ida, liliu haree ba nia infrastutura, nia fasilidade”, afirma.

JICA hanesan ajénsia administrativu integradu ne’ebé ho nia objetivu kontribui promosaun ba kooperasaun internasionál nomós dezenvolvimentu ekonomia Japaun no globál hodi suporta dezenvolvimentu sosio-ekonómiku, hadi’ak ka estabilidade ekonómiku husi rejiaun ne’ebé sei dezenvolve hela.

Ajénsia japonés ne’e nia misaun mak akordu kooperasaun dezenvolvimentu, serbisu ba seguransa umana no hasa’e kualidade.

Vizaun mak lidera mundu ho konfiansa. Katak, JICa ho nia parseiru sira sei lidera promesa ne’ebé nakonu ho fiar ba mundu tomak, fó inspira mundu tomak, fó inspira mundu iha dame no prosperiedade ne’ebé ema iha esperansa ba futuru ne’ebé di’ak no esplora poténsia ho oioin.

Istória kona-ba kooperasaun JICA iha Timor-Leste; 2000-2006 suporta rekonstrusaun no rehabilitasaun nasaun, 2006-2011 mak dezenvolvimentu sustentável harii nasaun auto-indepedénsia, 2012 nian mak kooperasaun ba dezenvolvimentu husi reabilitasaun.

Polítika bázika asisténsia Japaun (asiste prosesu harii baze ba dezenvolvimentu sustentável nasaun) define ba área prioridade tolu hanesan prioridade I (dezenvolvimentu no hadi’a infrastrutura sosio-ekonómiku), prioridade II (Promosaun diversifikasaun indústria) no prioriodade III (hadi’a no habelar prestasaun servisu sosiál).

Dezenvolvimentu no hadi’a infrastrutura sosio-ekónomiku mak projetu hasa’e kapasidade iha setór Estrada, ponte no kontrola bee sae iha Timor-Leste, projetu realokasaun terminal ró pasajeiru, portu Dili, Projetu konstrusaun ponte Komoro II, asesór ba avaliasaun projetu infrastrutura.

Promosaun diversifikasaun indústria husi JICA ba Timor-Leste mak projetu hasa’e rendimentu uma kain agrikultór sira liuhusi haforsa produsaun foos doméstiku iha Timor-Leste.

Asesór ba dezenvolvimentu indústria no projetu ba jestaun rekursu naturál sustentável bazea ba komunidade faze II. Inklui, polítika no asaun hodi hasori peska ne’ebé mak ilegál, la deklaradu no la regulamentadu (treinamentu ida fokus liubá ba iha rai laran).

hadi’a no habelar prestasaun servisu sosiál husi JICA ba Timor-Leste mak ramata ona projetu estudu kona-ba planu mestre sidade Dili no asesór ba integradu planeamentu, rehabilitasaun no hadi’a sistema fornesimentu bee moos, hasa’e kapasidade ba polísia komunitária, hasa’e kapasidade ema nian ba elaborasaun polítika.

Enkuantu, Ajénsia TATOLI, IP nu’udar ajénsia notisioza ofisiál estadu Timor-Leste nian, ne’ebé nia vizaun mak sai sentru informasaun ne’ebé kualidade no kredivel.

Ajénsia notisioza Timor-Leste estabelese bazea Rezolusan Konsellu-ministru, rezolusaun nú. 09/2016 ho data 16 marsu 2016.

Perfil ajénsia notisioza Tatoli; https://www.youtube.com/watch?v=ygNk8B82nT4

Jornalista: Rafy Belo

Editora: Rita Almeida

HUSIK IDA HATÁN