Primeiru-Ministru Taur Matan Ruak, ho membru governu sira, ohin partisipa debate reapresiasaun OJE 2019 iha uma fukun. Imajen Antonio Goncalves.

DILI, (TATOLI) – Parlamentu Nasionál (PN) liuhosi sesaun plenária estraordinária, ohin hahú debate reapresiasaun foun ba dekretu PN númeru 4/V – Orsamentu Jerál Estadu (OJE) 2019, ne’ebé hetan veta husi Prezidente Repúblika (PR), Francisco Guterres Lú Olo, iha loron 23 janeiru.

Dekretu ne’e aprovadu iha loron 22 dezembru 2018, iha finál globál ho votus a favor 40, kontra 25 no abstensaun 0, hafoin manda Xefe Estadu loron rua hafoin aprovasaun.

Razaun PR veta orsamentu ne’e tanba konsidera 2019 hamenus liután sustentatibilidade tanba valor aas liu, la hatuir Konstituisaun no lei estruturante sira, dezekilíbriu orsamentál aas tebtebes no alokasaun orsamentásira ladún fó benefísiu ba sidadaun, no ikus liu la iha polítika alternativa.

Montante inisiál husi proposta Governu ne’e billiaun $1,827 ne’ebé inklui ona ho impréstimu milliaun $87, hanesan orsamentu ne’ebé boot liu kompara ho orsamentu anteriór, ho másimu ezekusaun OJE 2016 ho montante billiaun $1,631.

Dotasaun orsamentál ba saláriu no vensimentu milliaun $214,04, bens no servisu milliaun $478,26, transferénsia públika milliaun $705,11, kapitál menór milliaun $29,40, no kapitál dezenvolvimentu milliaun $400,17.

Nune’e iha diskusaun, iha proposta aumentu ne’ebé aprovadu hanesan, proposta aumentu adisionál miliaun $300 ba akizisaun porsentu 26,56 husi partisipasaun empreza petrolífera Shell Austrália nian iha konsórsiu Greater Sunrise.

Nune’e iha OJE 2019 aumenta ho montante billiaun $2,132 tuir redasaun  finál ne’ebé submete ba PR.

Tuir giaun, debate ne’e sei hala’o durante loron ida no iha posibilidade to’o loron rua bainhira iha proposta barak mak deputadu sira aprezenta.

Bainhira laiha proposta alterasaun, intervensaun sira sei termina no sei realiza imediatamente votasaun konfirmasaun dekretu PN. 

Proposta ne’ebé aprezebta ba meza, tenke tama iha meza PN to fin debate iha faze jeneralidade.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here