Ministru Reforma Lejizlativa no Asuntu Parlamentár, Fidelis Leite Magalhães

OPINIAUN, (TATOLI)–Esperiénsia Konstitusionál ne’e nu’dar buat foun ida iha ita-nia rain. Kada oportunidade ne’ebé foun sai hanesan dalan ba ita atu hare’e Konstituisaun iha asaun, oin nune’e ita tenke simu, hanesan oportunidade ida atu hakle’an ita nia koñesimentu kona-ba instituisoens Estadu nian no hodi halo regra sira ne’ebé klaru hosi nia funsionamentu.

Krize ruma iha nia konsekuénsia negativa ba populasaun sira. Wainhira Estadu la lao, ne’e negativu tebes ba dezenvolvimentu. Wainhira órgaun soberania sira la koopera entre sira, populasaun maka sofre. Maibé, karik órgaun soberania balun la konsegue evita krize ruma, pelumenus importante maka sidadaun sira bele kompriende saida maka konstituisaun hateten hodi atu rezolve situasaun sira ne’e. Nune’e pelumenus bele tulun atu halo regras Konstituisaun nian sai klaru, hodi nune’e bele garante funsionamentu ida ne’ebé estável liu no efisiente ba Estadu, ba iha aban bairuak..

Vetu ba Orsamentu Jeral Estadu nian tinan 2019 ne’e sai hanesan ezemplu entre kazu sira ne’e. Ita tenki reflete ho seriedade kona-ba normas Konstituisaun nian ne’ebé bele aplika.

Tuir númeru 2 husi artº 88º iha Konstituisaun RDTL nian, atu konfirma diploma sira ne’ebé maka hetan tiha ona vetu regra jerál maioria absoluta hosi deputadu sira ne’ebé halao hela sira nia knar (deputadu nain 33).

Númeru 3 husi artº 88º, hodi nune’e, estabelese eseptu balun ba regra jerál katak “atu hetán konfirmasaun husi diploma sira ne’ebé tama iha matéria sira ne’ebé prevee iha artigu 95”.

Iha kazu matéria sira ne’e, konfirmasaun ba lei ruma ne’ebé veta tiha ona husu rua baluk tolu (2/3) husi deputadu sira ne’ebé marka prezensa “dezde katak ne’e bo’ot liu maioria absoluta husi deputadu sira ho efektividade funsaun sira nian”. Rua baluk tolu ne’e depende ba númeru deputadu sira ne’ebé marka prezensa iha momentu votasaun nian.

Iha kazu ba konfirmasaun OJE nian ne’ebé veta tiha ona: bele aplika regra jerál númeru 2 husi artigu 88º, ka regra espesiál ba matéria sira husi artigu 95º? Pergunta ida ne’e merese ita-nia atensaun no ita-nia hatán.

Matéria sira ne’ebé maka mai husi artigu 95º?

Artigu 95º iha parte ha’at. Maibé parte ida de’it, númeru 2 husi artº 95º, maka mensiona matéria espesífiku sira ne’e. Tuir mai, hanesan ne’ebé bele konfirma katak kuálker asuntu hirak ne’e la inklui OJE.

Ba leitór sira ne’ebé la’os jurista, há’u fó hanoin katak artigu 95º ne’e artigu ida ne’ebé estabelese “Kompeténsias Parlamentu Nasionál nian”.

Entre kompeténsia sira ne’e maka: halo lei sira “kona-ba kestaun bázika husi polítika interna no externa nasaun nian” (númeru 1 husi artigu 95º).

Iha sorin seluk (númeru 2 husi artigu 95º), maka lejizla kona-ba asuntu kompeténsia eskluziva Parlamentu Nasionál nian, hakarak dehan katak ba asuntu sira ne’ebé Parlamentu Nasionál ne’e deit maka bele aprova leis.

Númeru 2 husi artigu 95º ne’e inklui 17 asuntus kompeténsia eskluziva nian.

Entre sira ne’e maka, ezemplu: Halo lei sira kona-ba fronteiras RDTL nian; kona-ba Direitus Umanus; kona-ba Estatu titulares órgauns soberanu nian; kona-ba bazes sistema ensinu ka sistema saúde nian; entre asuntu sira seluk.

Asuntu sira ne’e mak ezije duni konfirmasaun ida husi deputadus 2/3 iha kazu vetu nian.

Maibé Orsamentu Jerál Estadu nian la inklui iha asuntu númeru 2 nian ne’ebé refere.

Importante atu hanoin katak rejime orsamental no OJE hanesan buat oin-oin.

Rejime orsamentál refere ba Lei Orsamentu nian no Jestaun Finanseira (Lei 13/2009 loron 21 fulan-outubru), entre balun ne’ebé eziste ona iha ordenamentu jurídiku iha ita-nia nasaun. Ne’e leis-kuadru ne’ebé estabelese norma sira ho referénsia válida ba orsamentu Estadu hotu-hotu. Lei sira ne’e husu konfirmasaun husi maioria deputadu sira 2/3 ne’ebé marka prezensa, tuir númeru 2 husi artº 95º, karik hetán vetu husi Prezidente.

Maibé lei hirak ne’e la publika no la tau iha vigór orsamentus Estadu nian. Karik wainhira Orsamentu Jerál Estadu nian rasik la husu 2/3.

OJE ne’e mensiona ona iha númeru 3 husi artigu 95º, maibé tanba asuntu sira ne’ebé la hanesan no laiha ligasaun ho konfirmasaun Lei sira nein ho vetus. Númeru 3 husi artigu 95º, Konstituisaun RDTL nian fó ba Parlamentu Nasionál kompeténsias atu realiza inisiativa sira ho natureza oin-oin. Vale duni hare’e ho atensaun ba kazu sira ne’ebé mensiona tiha ona iha númeru 3 husi artº 95º. Ne’ebé inklui:

“a) Konfirma (ratifica) nomeasaun husi Prezidente Supremu Tribunál Justisa nian no eleisaun husi Prezidente Tribunál Superiór Administrativu, Fizkal no Kontas nian;

  1. b) Tesi-lia kona-ba relatóriu atividades Guvernu nian;
  2. c) Eleje membru ida-idak ba Konsellu Superiór Majistratura Judisiál nian no ba Konsellu Superiór Ministériu Públiku nian;
  3. d) Tesi-lia kona-ba Planu no Orsamentu Estadu nian no mos relatóriu ezekusaun ninian;
  4. e) Fizkaliza ezekusaun orsamentál Estadu nian;
  5. f) Aprova no kansela akordus no konfirma (ratifica) tratadus no konvensaun internasionál sira;
  6. g) Fó amnistia sira;
  7. h) Fó konsentimentu ba deslokasaun Prezidente Repúblika nian iha vizita Estadu;
  8. i) Aprova revizaun ruma ba Konstituisaun tenke maioria deputadus 2/3;
  9. j) Autoriza no konfirma deklarasaun ba estadu-sítiu no estadu-emerjénsia;
  10. k) Propoen ba Prezidente Repúblika atu submete kestaun ho interesse nasionál ba referendu”.

Hanesan ne’ebé ita hare’e, númeru 3 husi artº 95º refere ba kompeténsia sira Parlamento Nacional nian ne’ebé la iha relasaun ho vetu nein ho konfirmasaun lei ruma neebé vetu tiha ona.

“Konfirma (ratifica) nomeasaun husi Prezidente Supremu Tribunál Justisa nian no eleisaun husi Prezidente Tribunál Superiór, Fizkal no Kontas nian” ka, hanesan ezemplu, “ fó konsentimentu ba deslokasaun Prezidente Repúblika nian iha vizita estadu nian” laiha relasaun ho ezijénsia husi 2/3 atu konfirma lei sira ne’ebé veta tiha ona. Hanesan “Tesi-lia kona-ba Planu no Orsamentu Estadu nian no ninia relatóriu ezekusaun” labele kahur ho matéria ne’ebé ezije 2/3 ne’e, karik wainhira mosu vetu ruma.

Nune’e númeru 3 husi artº 95 maka bele aumenta kompeténsias Parlamentu Nasionál nian. Ne’e la’os atu impoen ezijénsia ba Parlamentu Nacional kona-ba konfirmasaun lei sira.

Prova ida katak númeru 3 husi artigu 95º la refere ba konfirmasaun OJE husi Parlamentu Nasionál – nein ezije votasaun 2/3 nian – ne’e pontu i) rasik husi númeru 3.

Pontu i) temi kona-ba ezijénsia deputadus 2/3 nian hodi bele Parlamentu Nasionál aprova revizaun sira ba Konstituisaun ne’e;

Pontu d) ne’e, kona-ba OJE, la temi ezijénsia ida ne’e tanba la presija duni 2/3.

Tanba ne’e, ema ne’ebé tetu ho diak no sensatu bele konklui katak ezijénsia 2/3 refere de’it ba situasaun espesiál kona-ba asuntu kompeténsia eskluziva Parlamentu Nasionál nian (hanesan ne’ebé refere númeru 2 husi artº 95º no la inklui matérias númeru 3 husi artº 95).

Tuir mai, regra jerál númeru 2 husi artigu 88º, ne’ebé presiza maioria deputadus nain 33 deit, aplika mós ba lei OJE.

Respeitu ba Estadu Direitu ne’e prioridade dahuluk ba ita hotu-hotu, guvernu no sidadaun sira.

Nu’udar Ministru ba Reforma Lejizlativa no Asuntus Parlamentares há’u hetan nu’udar prioridade atu promove dezenvolvimentu sistema legál, atu nune’e bele haforsa tan Estadu Direitu no mos atu klarifika ho di’ak ninia funsionamentu.

Hodi nune’e ami bele serve di’ak liután sidadaun sira nomós haforsa konfiansa investidór sira. Interesse nasionál ba dezenvolvimentu no hasa’e moris-di’ak timor oan nian mak ezije leis ne’ebé klaru no sistema konstitusional ne’ebé estável.

Estadu Direitu ne’e hanesan rikusoin ida ba sistema polítiku. Nune’e labele sai fali hanesan razaun ba divisaun sira entre órgauns soberanu. Estabilidade ne’e mak kontribui atu hametin Estadu.

Liu husi timoroan sira-nia luta durante tinan 24 nia laran, ikus vitória iha referendu no Restaurasaun Independénsia mak lori dahuluk Estadu Direitu ne’e ba ita-nia rai. Realidade ida ne’e hanesan motivu orgullu ba ita hotu, nasionalista timoroan sira, inklui jerasaun foun sira.

Juventude ne’ebé moris ka bo’ot iha rai ida ne’e hafoin vitória Rezisténsia nian, hein mos solusaun pozitiva sira husi ukun-an ne’ebé bele hakotu ki’ak no dezenvolve nasaun ne’e atu hasa’e tan biban servisu haleu rai laran.

Prioridade nasionál maka atu promove dezenvolvimentu nasaun nian – inklui mós munisípius hotu-hotu. Dalan ida ne’e de’it maka bele hametin soberania nasionál no mellora moris-di’ak. Ba ida ne’e nasaun ne’e presiza iha Orsamentu Jerál Estadu nian aprovadu.

Órgaun soberanu sira iha dever atu modera radikalizmu no sira tenki servisu hamutuk atu bele aselera dezenvolvimentu nasaun nian.

Uza mekanizmu legál sira ne’e hanesan direitu ne’ebé ha’u la kontesta.

Maibé, oinsa kona-ba konsekuénsia sosiál sira ne’e? Di’ak liu tetu ho di’ak kona-ba konsekuénsia ba povu husi desizaun legál ida-idak ne’e. Di’ak liu, konsidera aumezmutempu impaktu desizaun legál sira ba ekonomia, liu-liu waihnira pará investimentu ne’e ka aumenta família sira ne’e nia mukit.

Minoria balun labele pará nasaun no Estadu tanba ne’e sai estratéjia ida ne’ebé dezilude esperansa jerasaun foun kona-ba sira-nia futuru. Estratéjia ne’e mós la tane aas pasadu heróiku husi ita-nia povu no rezisténsia Timor Oan nian.

Husi: Fidelis M. Leite Magalhães

HAKEREK NO HATÁN

Please enter your comment!
Please enter your name here