Xefe Bankada FRETILIN, Aniceto Guterres. Foto Antonio Goncalves

DILI, (TATOLI) – Bankada Opozisaun Frente Revolusionária Timor-Leste Independente (FRETILIN) vota kontra ba reapresiasaun foun ba dekretu Parlamentu Nasionál (PN), númeru 4/V, Orsamentu Jerál Estadu (OJE) 2019 ne’ebé hetan veta hosi Xefe Estadu, Francisco Guterres Lú Olo, iha 23 janeiru.

Iha votasaun finál globál ba dekretu PN, númeru 4/V ho votu afavór 40, kontra 25 no abstensaun zero. Tanba ne’e dekretu lei OJE aprovadu mezmu FRETILIN kontra.

Xefe Bankada FRETILIN, Aniceto Guterres, hateten hafoin rona ho atensaun hosi intervensaun Primeiru-Ministru, Taur Matan Ruak, ho Bankada Aliansa Mudansa ba Progresu (AMP), bele konklui katak maioria parlamentu lakohi hadi’a orsamentu ne’e, tanba ne’e ninia parte kontra.

“FRETILIN rona ona intervensaun hosi Primeiru-Ministru, Taur Matan Ruak, inklui Bankada Governu katak la iha dalan atu hanaruk tan, hatudu katak la iha dalan ona atu hadi’a orsamentu, nune’e FRETILIN vota kontra”, Aniceto Guterres hato’o nia intervensaun iha ámbitu reapresiasaun OJE 2019 iha PN, ohin.

Bankada FRETILIN vota kontra tanba opozisaun prefere atu halo diskusaun sériu, atu fó duni kumprimentu ba konstituisaun ne’ebé orgaun ida ne’e presiza, atu iha diálogu espesifíku ho orgaun ezekutivu atu bele hatene loloos oinsá bele hatan rekomendasaun Xefe Estadu nian ho maneira efikaz, nune’e bele fó satisfasaun ba orgaun soberania hotu liliu bele asegura interese povu nian.

Nune’e mós bankada FRETILIN nia intensaun hodi propoen ba plenária atu konsidera hodi estabelese komisaun eventuál hodi dirije diskusaun ne’ebé entre PN ho membru governu da-ualu.

Intensaun atu forma komisaun eventuál ida ne’e la’ós prátika foun, maibé sai ona dalan iha tinan hira nia laran ba governu ho PN atu konserta sira nia hanoin, sira nia polítika, atu hetan konsensu ba orsamentu.

Ida ne’e mak dalan ida bele hamutuk hodi supera impase ida ne’e maibé to’o ikus intervensaun sira hosi governu ho bankada AMP lakohi hadi’a orsamentu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here