iklan

DEFEZA, POLÍTIKA, SEGURANSA

Aeroportu Baukau Ho Estatuta Multi Funsaun

Aeroportu Baukau Ho Estatuta Multi Funsaun

Ministru Transporte no Komunikasaun, José Agostinho da Silva. Imagen Egas Cristovao

DILI, (TATOLI) – Ministru Transporte no Komunikasaun, José Agostinho da Silva, hatete tuir polítika governasaun da-ualu deside aeroportu Baukau (Lanud) sei sai aeroportu multi funsaun ba atividade komérsiu no militár bainhira prosesu reabilitasaun remata.

“Aeroportu Baukau ho ninia estatuta multi funsaun hodi uza ba atividade komérsiu no militár”, dehan ministru ba jornalista iha Parlamentu Nasionál, ohin.

Konsellu Ministru kuarta ne’e aprova ona deliberasaun interese Amérika hodi fó tulun ba governu ba projetu ne’e, tanba ne’e tuir nia MTK, Ministériu Obra Públika, Ministériu Defeza no Ministériu Negosiu Estranjeiru no Kooperasaun sei estabelese ekipa tékniku ida hodi halo estudu kle’an ba tulun ne’e molok tama implementasaun.

Nia dehan tan depois reabilitasaun, MTK maka sei toma responsabilidade hodi jere ba funsionamentu aeroportu ne’e, nomos la taka dalan ba investimentu rai liur hodi investe.

Prosesu reabilitasaun ne’e hodi kria kondisaun infrastutura bázika hanesan harii tore kontrolu, terminál pasajeiru sira, terminál kargu, pista nomos parte komponente integradu seluk bazea ba rekezitu organizasaun aviasaun internasionál tuir lei Organizasaun Internasionál ba Aviasaun Sivíl (ICAO-sigla inglés).

Ministru Defeza (MD), Filomeno Paixão de Jesus. Foto António Goncalves

Iha biban seluk, Ministru Defeza, Filomeno Paixão, hatete apoiu ne’e bazea ba pedidu hosi komandu F-FDTL antes, hodi fasilita fatin para elikópteru tanba aeroportu Dili laiha ona espasu.

“Sira hakarak mai ajuda de’it F-FDTL, tanba oras ne’e iha ona aviaun ki’ik ida atu para iha Dili mos fatin laiha, entaun aranza fatin ki’ik ida iha Baukau, nune’e mós tuir programa governu atu hola tan elikópteru karik para iha ne’eba”, dehan Governante ba Tatoli iha Palásiu Governu, ohin.

Governante konsidera apoiu ne’e importante ba dezenvolvimentu nasaun, tanba laiha interese balun hosi tulun ne’e.

Nia realsa prosesu diskusaun ho tékniku Estadu nasaun naklibur sira sei akontese iha tempu badak hafoin hetan ona despasu hosi Xefe Governu, Taur Matan Ruak.

Governu maka sei toma konta ba dezeñu maibé orsamentu sei responsabiliza hosi governu nasaun naklibur Amérika ho ninia montante sei iha prosesu diskusaun téknika.

Entretantu, Aeroportu Baukau harii kedas hosi governu portugés ho estatutu aeroportu internasionál ho pista naruk liu kompara aeroportu internasionál Prezidente Nicolau Lobato Komoro ho operasaun vó internasional.

Aviaun trans Austrália Airlines hosi Austrália maka halo operasaun iha momentu ne’eba. Enkuantu iha invazasaun Indonézia iha 1975 retoma aeroportu ne’e ba atividade militár hodi taka ba públiku.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!