Ministru Negosiu Estranjeiru no Kooperasaun, Dionísio da Costa Babo Soares. Imajen/António Gonçalves.

DILI (TATOLI) – Governu Timor-Leste liuhosi reuniaun Konsellu Ministru, ohin, Palásiu Governu, halo ona aprovasaun ba proposta rezolusaun ida kona-ba izensaun (perdaun) taxa ba  Japaun maibé molok aplika tenke lori ba Parlamentu Nasionál (PN) atu ratifika.

Proposta ba rezolusaun ne’e propoin hosi Ministru Negósiu Estranjeiru no Kooperasaun (MNEC), Dionísio Babo Soares, relasiona ho akordu tékniku ida ne’ebé uluk governasaun dahuluk halo maibé la konsege haruka ba PN atu halo aprovasaun  tanba iha izensaun taxa.

“Ita presiza fó izensaun taxa ba Japan, sira nia ema mai servisu, sira lori sasán mai, maibé parlamentu mak bele fó,” Babo ba jornalista sira iha Palásiu Governu hafoin reuniaun Konsellu Ministru, ohin.

Babo akresenta Timor-Leste servisu hamutuk ho Japan kleur ona. Iha primeiru governu halo ona rezolusaun ida kona-ba akordu tékniku kooperasaun maibé ita seidauk lori ba parlamentu atu halo aprovasaun ba proposta ne’e.

Além de ne’e mós KM análize akordu troka notas entre Repúblika Demokrátika Timor-Leste (RDTL) no Repúblika Federasaun Alemaña kona-ba kooperasaun téknika entre nasaun rua ne’e mak asina hosi MNEC.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here