Sekretáriu Estadu ba Asuntus Kombatentes Libertasaun Nasionál Gil da Costa Monteiro 'Oan Soru'. Imajen António Goncalves

DILI, (TATOLI) – Sekretáriu Estadu ba Asuntu Kombatente Libertasaun Nasionál (SEAKLN), Gil da Costa Monteiro ‘Oan Soru’, enkontru ho Ministru Negósiu Estranjeiru no Kooperasaun (MNEK), Dionísio Babo Soares, hodi koa’lia kona-ba preparasaun ba loron istóriku hanesan konsulta populár no prezensa forsa INTERFET.

“Tanba ne’e mak presiza  atu halo selebrasaun ida, ne’ebé iha polítika ida ne’e, ohin aprezenta iha konsellu-ministru, Primeiru-ministru hateten ona atu reuniaun ho Ministru Negósiu Estranjeiru ho Ministru em ezersísiu Estatál maibé nia la marka prezensa iha ne’e”, katak Gil Oan Soru ba jornalista iha edifísiu MNEK, Praia dos Coqueiros, lorokraik ne’e.

Nia haktuir durante sorumutu, parte rua ne’e hahú haree polítika oinsá estabelese komisaun organizadora ba komemorasaun tinan 20 loron konsulta populár no prezensa forsa internasionál ba Timor-Leste (INTERFET-sigla inglés).

Governante ne’e akresenta sei lori hanoin ne’e ba Konsellu-ministru hodi hetan desizaun. “Para legaliza komisaun organizadora ida ne’e ho nia estrutura sira atu bele organiza eventu ne’e iha fulan agostu ou setembru (tinan ne’e)”, katak.

Hanesan prosesu inisiál, governante ne’e seidauk bele temi programa sira ne’ebé atu realiza. “Ami labele si’ik de’it programa. Prosesu ne’e hahú bazea ba señor Primeiru-ministru ohin hateten halo tiha reuniaun entre ministeriál ruma hafoin aprezenta mai hodi haree no deside iha Konsellu-ministru tanba ida ne’e mak ha’u mai enkontru ho Ministru Negósiu Estranjeiru”, nia esplika.

Hanoin balun mak sei hasai konvite ba nasaun sira ne’ebé uluk apoiu Timor-Leste, hanesan Komunidade husi Nasaun sira ho Lian Portugés (CPLP-sigla portugés), nasaun sira hanesan G7+, organizasaun Sudeste Aziátika (ASEAN-sigla inglés), karik mós bele to’o Sekretáriu Jerál ONU ninian, sei mós eis-prezidente Amérika ninian no espoza eis-sekretáriu jerál Kofi Anan.

“Maibé hirak ne’e hotu atu hasai liafuan definitive, kuandu komisaun organizadora loos ona. Ami bele fó sai ona katak ema atu mai ne’e i konfirmadu sei liuhusi Ministériu Negósiu Estranjeiru. Tanba ne’e, ponte Timor-Leste nian ba mundu”, konklui Oan Soru.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here