Primeiru-Ministru, Taur Matan Ruak, ohin prezide reuniaun Konsellu Ministru iha Palásiu Governu. Imajen Mídia GPM

DILI, (TATOLI) – Governu liuhosi Konsellu Ministru, ohin aprova rezolusaun governu ba polítika zero plástiku hodi halo redusaun ba utilizasaun kímiku.

“Governu liuhosi funsaun públika atu hahú fó ezemplu di’ak, atu to’o tempu bele jeneraliza área seluk liuhosi sekretáriu estadu meiu-ambiente”, dehan Ministru Prezidensia Konsellu Ministru, Hermenegildo Augusto Cabral Pereira, ba jornalista sira hafoin enkontru KM iha Palásiu Governu, ohin.

Nia dehan polítika ne’e tanba konsidera polusaun ne’ebé mosu, provoka hosi utilizasaun protudu kímiku nu’udar dezafiu prinsipál ba umanidade no ambiente. Polítika ne’e mós oinsá atu bandu no regulariza servisu hodi uza plástiku kímiku iha fatin servisu.

Alende ne’e aprova mós rezolusaun Governu hodi kria komisaun interministérial, koordena no reforma jestaun patrimóniu Estadu nian.

Komisaun ne’e kompostu hosi Primeiru-Ministru no ministériu ne’ebé responsavel ba área governasaun ba reforma lejislativa, finansa, justisa, no administrasaun estatal.

Misaun hosi komisaun ne’e maka hadi’a di’ak liután sistema jestaun patrimóniu mobiliáriu no imobiliáriu Estadu nian ho forma atu uza ho di’ak no evita despeza inutíl.

Proposta hosi Ministériu Justisa kona-ba dekretu lei ba regulasaun organizasaun no funsionamentu ba komisaun terras propriedades hetan aprovadu hosi membru Governu sira, tanba orgaun ne’e maka sei responsavel ba kazu disputa kona-ba bens imóveis.

Reuniaun ohin taka ho aprovasaun pontu toleránsia iha loron 5 fulan-fevereiru 2019 loron tomak ba funsionáriu públiku, ajente hosi ministériu no ajente administrasaun públika hodi selebra tinan foun Xina nian.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here