DILI, (TATOLI) – Asosiasaun Jornalista Timor-Leste (AJTL) preokupa ho liberdade imprensa iha Timor-Leste relasiona ho espresaun jornalista RTTL,EP, Costancio Vieira, ne’ebé públika iha mídia sosiál, Facebook.
“Pesoál balu Instituisaun Estadu no Governu nian hahú ameasa no bandu jornalista sira atu labele espresa sira nia pensamentu kona-ba asuntu sira ne’ebé relasiona ho interese públiku nian iha plataforma sira mídia sosiál”, deklara Sekretáriu Ezekutivu AJTL, Acacio Pinto, liuhosi deklarasaun imprensa ne’ebé halo iha sede AJTL Fatuhada, ohin.
Hatutan iha deklarasaun ne’e: “Ameasa ne’ebé Xefe Gabinete, Sekretáriu Estadu Komunikasaun Sosiál (SEKOMS) halo hasoru jornalista RTTL, EP, Constancio Vieria, iha loron 11 janeiru 2019 nu’udar hahalok ditadura ne’ebé la afavor ba prinsípiu liberdade imprensa no espresaun iha nasaun demokrátiku ida-ne’e. Xefe gabinete ne’e ameasa atu hasai Jornalista Constancio Vieira husi nia knaar nu’udar jornalista RTTL, EP”.
Constancio Vieira haktuir iha loron 11 fulan-janeiru halo públikasaun iha Facebook ho lia-fuan tanbasá la kria polítiku hodi aumenta oras emisaun, sosa ekipamentu modernu maibé kria polítika atu hasai no ezonera tan de’it kór polítiku.
“Ida ne’e ha’u nia liderdade esperasaun ne’ebé ha’u ko’alia, hakerek iha artigu 40 konstituisaun RDTL”, dehan nia.
Ho publikasaun ne’e, nia dehan hetan kedas kontaktu hosi Xefe Gabinete iha loron hanesan iha tuku 12.00 atu hasoru malu hodi hatudu faktu balun kona-ba erru balun ne’ebé eis Prezidente Konsellu Administrativu RTTL,EP komete. Maibé bainhira hasoru malu iha Palásiu Governu hetan kedas ameasa atu hasai hosi RTTL,EP bainhira kontinua krítika desizaun governu.
Hatan ba kestaun ne’e, iha sikun seluk Sekretáriu Estadu Komunikasaun Sosiál, Merício Juvenal dos Reis Akara, sujere atu jornalista no asosiasaun bele hato’o ba Konsellu Imprensa (KI) hodi buka solusaun.
Preokupasaun ne’ebé jornalista sira sente, governante ne’e kontinua fó korajen katak governu garante liberdade imprensa ba jornalista sira hotu tuir lei-inan hatete.
“Asosiasaun jornalista sira iha direitu hato’o reklamasaun ba asuntu A to’o Z maibé dalan mak ne’e tenke kestiona liuhosi konsellu imprensa hodi buka dadus no investiga ho loloos, liberdade redasaun to’o agora laiha buat ida, tanba laiha ema ida maka bandu, halo intervensaun”, afirma Akara.
Governante ne’e husu ba jornalista no mídia sira atu mantein independensia, nune’e labele monu ba lasu polítiku hosi pesoál no grupu sira nian interese.
Nia akresenta la aseita pedidu asosiasaun sira nian hodi ezonera Xefe Gabinete bainhira laiha faktu konkretu.
Pozisaun AJTL
Liuhosi deklarasaun ne’e, AJTL husu ba Konsellu Imprensa (KI) nu’udar instituasaun Estadu Independente ne’ebé promove no defende liberdade imprensa no liberdade espresaaun iha nasaun atu toma konsiderasaun. Alende ne’e husu ba entidade hothotu atu tane aas servisu jornalista iha terenu.
Organizasaun ne’e mós husu jornalista hotu atu mantein independensia editoriál tuir prinsípiu universál jornalizmu no Kódigu Étika hodi tane interese povu.
Nune’e mós husu ba polítiku sira ka governu iha futuru atu la halo politizasaun ba instituisaun mídia públiku hanesan RTTL, EP, Tatoli, IP no mídia profisionál sira seluk, tanba instituisaun hirak ne’e la’os instituisaun polítika, maibé kanál mídia sira ne’e nu’udar instituisaun profisionál atu halo kontrolu sosiál hodi garante transparénsia no kontabilidade iha Nasaun demokrátika.
AJTL mós husu ba instituisaun mídia sira atu uza jurnalizmu ba dame, relasiona ho situasaun polítika rai-laran, nune’e servisu jurnalizmu la hamosu konflitu.
Husu tan ba KI kontinua tau matan ba instituisaun mídia sira hodi haree ba kontiudu notísia ne’ebé dalaruma hamosu konflitu no rekomenda atu uza jurnalizmu ba dame.
Jornalista: Agapito dos Santos
Editora: Rita Almeida
