Prezidente Tribunál Rekursu, Deolindo dos Santos. Imajen Egas Cristovão

DILI, (TATOLI) – Prezidente Tribunál Rekursu (PTR), Deolindo dos Santos, hateten Prezidente Repúblika rasik nomós orgaun sira seluk bele halo prosesu ruma ba lei ne’e (alterasaun Lei Atividade Petrolifera-LAP) tanba konstituisaun maka fó dalan.

“Enkuantu seidauk iha pedidu ida, tribunál labele pronúnsia antesipadamente. Bainhira iha pedidu ka iha prosesu ruma, tribunál tenke hateten buat ruma kona-ba pedidu ida ne’e dezde pedidu ne’e mai hosi Prezidente Repúblika rasik no orgaun sira seluk ne’ebé konstituisaun fó kompeténsia”, Deolindo ba jornalista sira iha Palásiu Prezidente Nicolau Lobato, Bairru Pité tersa ne’e, hafoin levanta atividade tribunál ba Xefe Estadu, Francisco Guterres Lú Olo.

Nia haktuir to’o ohin loron seidauk iha pedidu hosi orgaun ruma aprezenta ba Tribunál Rekursu atu halo rekursu ba promulgasaun ba alterasaun dahuluk hosi LAP.

Antes ne’e, Prezidente Repúblika liuhusi ninia deklarasaun iha promulgasaun alterasaun LAP realsa konstituisaun artigu 150 fó dalan ba tribunál atu halo fiskalizasaun preventiva ba orsamentu ne’ebé ligadu ba sosa asaun kompañia esploradór mina no gás, maski LAP hasai ona kompeténsia Tribunál Kontas atu fó vistu prévia.

“Bainhira ita ko’alia kona-ba méritu ba diploma ne’e rasik, ha’u sempre rezerva buat balun ne’ebé ha’u labele hateten iha públiku, tanba aleinde Prezidente Tribunál Rekursu, ha’u mós hanesan juiz ida iha Tribunál Rekursu, entaun ha’u lakohi pronúnsia antesipadamente ba kestaun ne’ebé sei pendente”, Deolindo tenik.

Kona-ba enkontru ho Xefe Estadu, haktuir, nia levanta serbisu tribunál nian ba Prezidente Repúblika, liu-liu serbisu sira halo iha fulan ida nia laran maka prosesu nian la’o normál hahú hosi primeira instánsia to’o iha Tribunál Rekursu.

Nia hatutan ko’alia mós ba buat ne’ebé relasaun ho jestaun iha tribunál ne’ebé realmente buat balun presiza haree iha futuru mai.

“Pontu ida maka ha’u hato’o ba Prezidente Repúblika katak sei iha promosaun ba juiz sira ne’ebé sei hala’o iha tinan ida ne’e nia laran no hafoin promosaun sei halo mudansa mós ba juiz sira ne’ebé destaka iha Tribunál Dili, Baukau, Suai no Oekusi”, afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here