Foto Gabinete Primeiru-Ministru, Taur Matan Ruak.

DILI (TATOLI) –Primeiru-Ministru Taur Matan Ruak, iha Segunda lokraik hala’o vizita ba Restaurante ne’ebé promove hahán lokál ho naran Agora Food-Studio, iha Kampu Alor, tanba hetan konvite, hodi ba koko han hahán lokál hirak ne’ebé kuaze timoroan sira husik ona no la konsumu.

“Ha’u kontente tebetebes bainhira promove ai-han lokál ita nian, ha’u gosta han hahán lokál, ha’u foin mak mai maibé ha’u hakarak mai beibeik,” Primeiru Ministru (PM), Taur Matan Ruak nia lia-fuan badak bainhira partisipa iha serimónia han kalan ne’e.

Primeiru Ministru sente orgullu tebes tanba ai-han lokál TL nian bele alista iha mapa gastronomia mundiál tanba atu estimula orgullu kultura no fó konfiansa ba ema lokál atu kuda hahán no promove ita nia ai-han tradisionál no indíjena ba ita nia saúde, ekonomia no kultura.

“Ha’u impresionadu tebes atu haree fali ba pasadu liuhosi promosaun hahán lokál, timoroan tenke valoriza ai-han lokál ne’ebé di’ak,” PM Taur espresa.

Entretantu programa pilotu Timor-Leste (TL) Food Innovation Exchange konvida ona Robert Oliver hanesan autór ba manan-na’in mundiál no aprezentadór serial televizaun revolusaun ai-han iha illa pasífiku (OIFR), koñesidu Nova Zelándia nian atu mai kolabora ho inovadór ai-han foin sa’e timoroan  hodi identifika menu nasionál TL nian hodi bele aponta iha mapa gastronomia mundiál.

Liuhosi Robert Oliveira nia prezensa iha TL, sei loke mós posibilidade ba TL hodi partisipa iha serial televizaun PIFR Show ne’ebé dirije rasik hosi nia no hamutuk ho nasaun illa pasífiku sira seluk hodi demonstra ita nia hahán ba rai li’ur liuhosi mídia televizaun.

Alende ne’e mós, Robert Oliveira sei fahe istória pasífiku no TL nia tradisaun ne’ebé úniku, riku bio diversidade no kulinária atu bele troka matenek kona-ba ita nia bio diversidade no kultura ai-han nian.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here