Miguel Maia dos Santos. Foto: Sentru Quesadhip Ruak

DILI (TATOLI)-Instituisaun akadémika públika, Universidade Nasionál Timor Lorosa´e (UNTL) sei “fanu” estudante sira, ne´ebé tempu naruk ona la tuir regulamentu akadémiku, ne´ebé másimu lisensiatura, semestre 12.

“Ida ne´e mak ami atu hanoin, ho hanoin ida pozitivu, atu fanu estudante sira, fó prioridade ba sira husi turnu 2004; purezemplu. Ou, sei iha restu 2000 ba leten ne´e, ho turnu ida, tenke halo hotu sira-nia estudu iha semestre ida ou rua. Depois ida ne´e, se lae, tama ona ba prosesu Drop Out,” informa Pro-reitór Asuntu Akadémiku, Miguel Maia dos Santos ba jornalista sira, iha Kampus Sentrál UNTL, Díli, ohin.

“Ne´e atu fanun, la´ós hanoin atu husik sira toba hela de´it, maibé fanun sira atu bele hakfodak hodi halo inskrisaun no halo hotu (estudu-red). Ne´e parte husi estudante,” reforsa Pro-reitór Asuntu Akadémiku.

Enkuantu ba dosente sira, Pro-reitór Asuntu Akadémiku, Miguel Maia akresenta: “Parte dosente ami mós fó hanoin katak tenke fó atensaun másimu ba sira antigu sira ne´e para atu labele tau em causa fali iha prosesu administrasaun no avaliasaun externa”.

Iha fatin hanesan, akadémiku UNTL ne´e mós informa katak tinan létivu no akadémiku ho situasaun foun 2019 ne´e, komunidade akadémika UNTL hotu, tuir planu, jestaun, sei hahú ho reinskrisaun, depois orientasaun akadémika no komesa aula ka prosesu aprendijazem.

“Dalan rua, ba estudante tuan, aula akadémika hahú dadaun ona. Maibé, reinskrisaun ne´e seidauk atinji númeru ne´ebé mak ita iha, tanba totál númeru estudante rihun 30 maibé atinji seidauk to´o métade. Tanba ne´e taka tiha ona iha 25 (janeiru) ne´e maibé kontinua tolera ba sira ne´ebé sei mai to´o fulan ne´e ramata,” nia informa

“Fulan ne´e ramata sei la kontinua ona tanba prosesu ensinu aprendizajen iha fakuldade, iha departamentu balun la´o dadaun,” hatutan tan profesór ne´e.

Enkuantu ba estudante tuan, Pro-reitór Asuntu Akadémiku, Miguel Maia dos Santos informa katak tuir kalendáriu, depois inkrisaun, loron 5, 6, 7 orientasaun akadémika, ne´ebé fahe ba rua, deliberasaun husi universidade, depois ba fakuldade.

“Depois enseramentu orientasaun, tuir tempu seguinte depois prosesu ne´e hotu kontinua kedas ho aula létiva hanesan babain,” hateten pro-reitór.

Husu kona-ba tipu orientasaun ba estudante foun ba estabelesimetu ensinu superiór ne´e, Pro-reitór Asuntu Akadémiku, Miguel Maia  akresenta: “Ita halo avaliasaun, ne´ebé tinan kotuk di´ak, kontinua la´o. Buat ne´ebé laduun di´ak ita presiza hadi´a, atu bele efetivu liutan i nune´e iha komunikasaun tenke iha komunikasaun ida komunikativa, komprensiva”.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here