Xefe Departementu Empregu Esteriór, Sekretariu Estadu Formasaun Profesionál no Empregu (SEFOPE), Belarmino da Cruz. Imajen Egas Cristovão

DILI, (TATOLI) – Xefe Departementu Empregu Esteriór, Sekretariu Estadu Formasaun Profesionál no Empregu (SEFOPE), Belarmino da Cruz, relata traballadór timoroan ne’ebé servisu iha programa seasonal worker Austrália, hahú 2014 to’o 2018 konsege rekolla retornu milliaun $9,698,579.15 resin mai Timor-Leste (TL).

“Bainhira kolega sira fila hosi Austrália  sira tenke aprezenta án iha ne’e no aprezenta tan osan hirak maka sira lori, entaun hosi totál osan ne’ebé ami rekolla $9,698,579.15 maibé kolega sira balun foin lalais fial mai ne’e seidauk aprezenta án, tanba ne’e ami seidauk rekolla”, dehan nia ba Tatoli iha ninia servisu fatin, ohin.

Nia haktuir dadus hosi 2014 to’o 2018 timoroan hamutuk 2819 maka servisu ona iha Austrália liuhosi programa seasonal worker iha área ospitalidade no ortikultura hanesan iha tinan 2012 traballadór hamutuk12, 2013 ema 36, 2014 131, 2015 181, 2016 ema 298, 2017 ema 782, 2018 ema 1380 resin no 2019 ema lima.

Iha área ortikultura mane 1823 no feto 744, ospitalidade mane 187 no feto 95. Belarmino da Cruz hatutan totál traballadór ne’e balun servisu repetidu to’o ona dala haat liu bazea ba prestasaun servisu ne’ebé presta durante servisu iha kompañia sira iha Austrália ho durasaun fulan neen.

Nia hatete tuir  dadus ne’ebé diresaun rekolla hosi rezultadu programa haruka traballadór servisu iha Austrália no Korea Súl hatama reseita ho montante boot ba daruak hafoin reseita mina no gás.

Alende ne’e, oras ne’e dadauk SEFOPE mós taka sai ona lista naran kandidatura 753 feto 24, 729 ne’ebé pasa ona testa hanesan motorista hodi prepara ba servisu iha Austrália tuir nesesidade kompañia sira iha Austrália.

“Sira ne’ebé pasa ona la signifika tenke ba ona Austrália maibé  hatama iha baze dadus  hodi oferese dadus ne’e ba merkadu no presiza sira maka mai fó tan teste direta hodi ba servisu”, dehan tan.

Entretantu, programa formasaun lian-Korea ba joven sira seidauk la’o hafoin paradu hahú iha 2017 to’o agora hodi hein, tanba problema orsamentu, maibé governasaun da-ualu kompromitidu sei kontinua programa ne’e iha 2019 tuir kompromisu Estadu rai rua iha tinan kotuk sei haruka traballadór rihun rua ba Korea kada tinan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here