DILI, (TATOLI) – Prezidente Parlamentu Nasionál (PPN), Arão Noe, no Primeiru-Ministru (PM), Taur Matan Ruak, hasoru malu hodi ko’alia kona-ba implementasaun Lei Atividade Petrolífera (LAP), ne’ebé foin lais hetan ona promulgasaun husi Prezidente Repúblika (PR), Francisco Guterres Lú Olo.

“Pontu importante mak Governu atu informa Lei Atividade Petrolífera hetan promulgasaun, ninia implementasaun no prosesu oinsá”, tenik Sekretáriu Estadu Komunikasaun Sosiál, Merício Juvenal dos Reis Akara, ne’ebé akompaña mós diskusaun ne’e iha Palásiu Governu, ohin.

Akara haktuir enkontru ne’e Xefe Governu informa prosesu la’o dadaun no espera laiha problema, tanba ne’e kompromissu nasionál atu hola asaun.

“Ita nia pozisaun klaru, katak sei hola tanba ne’e mak agora Prezidente Parlamentu Nasionál husu ninia progresu oinsá, hafoin lei ne’e promulga. Nune’e Primeiru-Ministru hatete parte tékniku la’o hela no Ministra Finansa fó hela atensaun ba prosessu ne’e”, dehan.

Nia hatutan: “Primeiru-Ministru dehan prosesu sira ne’ebé mak liga ba interesse nasionál, labele halo terde no tenke fó atensaun barak, tanba ne’e hanesan kompromisu Governu atu avansa, no iha desizaun ne’e atu aselera prosessu”.

Alende ne’e, orgaun soberanu rua ne’e mós diskute Orsamentu Jerál Estadu (OJE), ne’ebé hetan veta husi PR no iha loron 31 janeiru agora sei halo reapresiasaun iha Parlamentu Nasionál (PN).

“Parte governu prontu atu ba fali Parlamentu no sei iha tempu ba Xefe Governu atu ko’alia uituan iha plenária”, katak.

Tuir Governante ne’e kona-ba OJE, parte governu konsidera agora kompeténsia PN atu responde, maibé fiar katak iha tempu badak orsamentu sei fila ba PR.

“Governu mós hanoin katak povu la presiza hein prosesu ne’e kleur, tanba sira nia nesesidade hakarak mak dezenvolvimentu la’o no orsamentu ne’ebé apóia atividade ekonomia rai laran para sira bele dezenvolve sira nia  moris”, tenik tan.

Entretantu hafoin enkontru lideransa orgaun soberanu rua ne’e remata, PPN konvoka kedan enkontru ho lider bankada sira.

Liuhosi reuniaun plenária estraordinária loron 14 novembru 2018, maske hetan krítika maka’as husi deputadu opozisaun sira (FRETILIN no PD), maibé projetu LAP ne’e pasa ho votu a favor 37, kontra 22 no abstensaun 0.

Projetu ne’e kontein husi artigu tolu ne’ebé, artigu 1o relativu ho objetu determina lei 1a alterasaun ba lei n.o 13/2005, 2 de setembru, artigu 2 o estabelese redasaun foun husi artigu 22 o lei n.o 13/2005 ne’ebé viza altera no artigu 3 o, estipula entrada vigór iha loron tuir mai bainhira halo publikasaun no redusaun efeitu iha 27 setembru 2018.

Alterasaun konkretu iha proposta ba artigu 22o lei n.o 13/2005 lei atividade petrolífera mak prevee la’ós de’it ba partisipasaun Estadu Timor-Leste iha operasaun petrolífera, mas ema koletiva públika timoroan ne’ebé hakarak direitamente liuhosi entidade seluk totalmente kontrola husi ema koletiva públika rasik.

Nune’e mós limite porsentu 20 ba partisipasaun operasaun petrolífera sira, aplikavel ba kazu iha partisipasaun ne’ebé rezulta trazasaun komersiál ida ou ajudikasaun iha termu lei.

Ikus liu, kontratu hotu atu permite partisipasaun iha operasaun petrolífera sira no relativu ba kondusaun despeza operasaun, maibé hasai fiskalizasaun prévia husi Tribunál Kontas husi Tribunál Superior Administrativu, Fiskál no Kontas.

Hafoin hetan veto husi PR no hetan reapresiasaun iha plenária, ikus liu Dekretu Lei PN ne’e hetan promulgasaun husi Xefe Estadu foin lais ne’e no hein de’it ninia implementasaun

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here