Ministru Defeza no Ministru Interiór Interinu, Filomeno Paixão. Imajen: António Goncalves

DILI, (TATOLI) – Ministru Defeza no Ministru Interiór Interinu, Filomeno Paixão, ohin simu ona orientasaun hosi Primeiru-Ministru, Taur Matan Ruak, iha Palásiu Governu hodi hadi’a polítika ba integrasaun servisu entre Polísia Nasionál Timor-Leste no FALINTL Forsa Defeza Timor-Leste (F-FDTL) ba futuru.

“Primeiru-Ministru bolu ha’u hodi fó instrusaun ba planeamentu ne’ebé atu halo ba oin, tantu ba PNTL no FALINTL-Forsa Defeza Timor-Leste, planeamente tempu badak, naton no naruk, maibé liuliu konsentra ba integrasaun servisu ba forsa rua ne’e tenke hamutuk, kompleta malu, hatutan malu para lori seguransa totál ba nasaun”, dehan Governante ba jornalista sira hafoin sorumutu.

Iha instrusaun ne’e oinsá atu atu kria lei no alterasaun ba lei balun ne’ebé ladun benefisia instituisaun rua ne’e hodi sinkroniza servisu ida kompleta malu no hatutan malu, garante seguransa ba nasaun no povu.

Nia hateten desizaun Xefe Governu ne’e hola bazea ba esperénsia ne’ebé akontese iha pasadu   hanesan problema membru PNTL no F-FDTL iha munisípiu Bobonaru, Ainaru hodi estraga imajen instituisaun.

“Bainhira ha’u sai ministru hodi haree mós polísia, ha’u hanoin kedas tenke integra planeamentu forsa rua ne’e la’o ba oin atu forsa rua ne’e kompleta malu, la’ós forsa rua maka han malu, tuir loloos forsa rua ba fó seguransa maibé sai fali ameasa ba fali povu entaun ida ne’e tenke akaba”, afirma.

Ba futuru, nia realsa forsa rua tenke sai amigu ba sidadaun hodi labele sai despeza boot ba Estadu maibé tenke iha sustentabilidade ba seguransa nasaun tantu iha fronteira, kapitál, aéreu no marítima.

Bainhira polítika integrasaun ne’e realiza ona maka prosesu treinamentu ba membru PNTL no F-FDTL foun  bele realiza iha fatin formasaun hanesan.

“Bainhira forsa sira balun sai tanba kontratu tinan hitu de’it bele ba fali polísia, nusa mak labele, tanba ne’e primeiru fó hanoin ami atu tinan ida ne’e laran atu halo planu ba ida ne’e”, katak tan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here