Prokuradór Jerál Repúblika, José da Costa Ximenes. Imajen/António Gonçalves

DILI, (TATOLI) – Prokuradór Jerál Repúblika, José da Costa Ximenes, hateten Ministériu Públiku (MP) iha planu atu rekruta ofisiál justisa hamutuk 14 iha tinan ne’e.

Nia hatutan iha loron 15 fulan-setembru, ofisiál na’in 14 ne’ebé MP rekruta sei hahú ho prosesu formasaun iha 15 setembru to’o fulan 18 nia laran para suporta prokuradór foun sira atu tama.

Nia haktuir rekrutamentu refere trasa liuhusi retiru anuál Konsellu Superíor Ministériu Públiku ninian ne’ebé defini planu Prokuradoria Jerál Repúblika nian ba 2019.

Ximenes informa tuir planu ne’e, la’ós halo rekrutamentu de’it maibé halo preparasaun oi-oin ba kargu sira seluk ne’ebé sei mamuk iha Ministériu Públiku.

“Iha planu ne’e, primeiru, hahú iha primeiru trimestre (janeiru-marsu), ami sei halo preparasaun ba kargu sekretáriu sira ne’ebé iha Ministériu Públiku. Ita-boot sira hatene katak sekretáriu sira iha Ministériu Públiku ne’e nomeasaun pur-internu de’it”, katak nia ba jornalista sira hafoin sorumutu ho Xefe Estadu iha Palásiu Prezidensia Bairru Pité, ohin.

Nia hatutan tan: “Segundu, ita mós sei halo promosaun ba kargu eskrivasaun direitu sira. Sira ne’ebé iha adjuntu eskrivasaun direitu sei promove ba eskrivasaun direitu. Depois ita mós sei promove ofisiál dezijénsia ba adjuntu eskrivaun”.

Prokuradór Jerál afirma jullu tinan ne’e, Ministériu Públiku mós sei halo planu inspesaun ordinária ba prokuradór na’in haat ne’ebé priénse ona rekezitu para promove ba primeira klase.

“Aproveita mós hato’o ba Prezidente Repúblika katak iha setembru no outubru tinan ne’e, ita sei halo promosaun ba prokuradór na’in 10 ne’ebé kompleta ona tinan tolu ba segunda klase. Iha mós formandu (prokuradór) na’in lima ne’ebé termina ona faze prátika iha Ministériu Públiku, agora tama ona iha faze estajiáriu hahú no iha 1 Fevereiru sira na’in lima sei tama hanesan prokuradór estajiáriu iha Ministériu Públiku. Ida ne’e atu reforsa tan ita-nian kuadru prokuradór sira”, nia tenik.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here