Ai-oan Ida nu’udar parte husi kompromisu polítiku promove meiu-ambiente no dezenvolvimentu sustentavel. Imajen hosi google

DILI, (TATOLI) – Prezidente Repúblika, Francisco Guterres Lú Olo, ohin hahú kampaña Nasionál kuda ai-oan iha Estatua São João Paulo II, Golgota no Marabia, hodi kontribui ba meiu-ambiente no dezenvolvimentu sustentavel.

Prezidente Repúblika, Francisco Guterres Lú Olo, ohin hahú kampaña Nasionál kuda ai-oan iha Estatua São João Paulo II, Golgota no Marabia, hodi kontribui ba meiu-ambiente no dezenvolvimentu sustentavel. Mídia PR

Prezidente Repúblika inisia kampaña ne’e ho tema “Sidadaun Ida, Ai-oan Ida” nu’udar parte husi kompromisu polítiku promove meiu-ambiente no dezenvolvimentu sustentavel ne’ebé fó sai iha serimónia tomada pose iha Tasi Tolu, 20 maiu 2017.

Tuir nota komunikadu ne’ebé Tatoli asesu haktuir inisia kampaña ne’e hodi mobiliza rekursu hotu-hotu ne’ebé nasaun ne’e iha atu kontribui ba meiu-ambiente no dezenvolvimentu sustentavel ho partisipasaun sidadaun hotu-hotu ninian. Prezidente Repúblika hakarak promove sidadaun ativa iha prosesu dezenvolvimentu nasionál.

Atividade ne’e sei partisipa hosi entidade oinoin hanesan; Governu, organizasaun sosiedade sivíl no igreja Katólika.  Kampaña ne’e sei habelar to’o iha suku hotu-hotu.

Iha nota imprensa ne’e Xefe Estadu husu atu sidadaun ida-ida kuda ai-oan no tau matan ba ai-oan hodi halo Timor-Leste ida ne’ebé furak no matak.

Kuda ai-oan sei kontribui ba proteje, konserva rai, bee, flora, fauna no bele uza nu’udar fontes ba rendimentu. (ki)

HAKEREK NO HATÁN

Please enter your comment!
Please enter your name here