Grupu eskuteiru sira, ohin partisipa mós kampaña nasionál kuda ai-oan iha Estatua São João Paulo II, Tasitolu, ne’ebé organiza hosi Prezidente Repúblika, Francisco Guterres Lú Olo. Imajen António Gonçalves

DILI, (TATOLI) – Prezidente Repúblika, Francisco Guterres Lú Olo, sesta ne’e iha área Estátua João Paulo II, Tasi-Tolu, lansa Kampaña Nasionál ho tema “sidadaun ida, ai-oan ida” ho objetivu eduka komunidade hodi haburas, hametin domin no responsabilidade ba ai-hún ida.

Tuir Lú Olo kuda no kuida ai-oan sei garante ambiente furak no saudável ba jerasaun ohin loron no tuir mai.

“Iha rai ne’ebé de’it iha mundu, futuru di’ak saudável signifika moris beibeik iha ambiente matak no espési oi-oin buras iha fatin hotu-hotu, iha foho leten, iha rai tetuk, iha bee dalan no debu ninin nomós iha tasi ibun”, afirma.

Entidade importante balun hamutuk ho Prezidente Repúblika, Francisco Guterres Lú Olo, ohin partisipa kampaña nasionál kuda ai-oan iha Estatua São João Paulo II, Tasitolu. Imajen António Gonçalves

Nia akresenta: “Bainhira ai-hun barak buras hamutuk ninia abut kaer metin rai no nia sanak ho tahan buras tane udan been no hamenus forsa udan been bainhira monu iha rai leten”.

Nia hatutan foho matak no bee-dalan matak garante funsaun bazeia hosi hidrográfika nian, área ne’ebé iha funsaun akapta udan been no garante bee ne’ebé bebeik, mota boot sira no debun sira ba rai okos, hodi garante ema nian moris no dezenvolvimentu ekonómiku.

“Bainhira ita la tesi ai arbiru iha foho leten, ita sei hetan bee-moos ba beibeik, rai sei la halai no ita sei la halakon rai bokur ne’ebé ita presiza ba agrikultura, konservasaun ba rai, bee no hamoris seguransa alimentár”, katak Xefe Estadu.

Nia hein katak sidadaun ida-idak sei haforsa liu-tan atu kaer metin kompromisu boot ida ne’e, kuda ai-oan ida no haree oinsá tau-matan ba ai-oan ida ne’ebé to’o abut kaer metin ba rai.

Lansamentu Kampaña Nasionál ne’e nu’udar inisiativa hosi Prezidénsia Repúblika, ne’ebé hetan apoiu hosi Bispu Dioseze Dili, Don Virgílio do Carmo da Silva, Pároku Parókia Maria Auxiliadora Comoro, Administradór Postu Don Aleixo no Vera Kruz, Diresaun Nasionál Floresta, Uniaun Eskuteiru Nasionál, lideransa komunitáriu no populasaun lokál.

Kampaña nasionál ne’e aleinde hala’o iha área Tasi Tolu, hala’o mós iha Golgota no Marabia. Área tolu ne’e ida-idak iha nia signifikadu espesiál. Área estátua João Paulo II ho área Golgota (Gruta Nosa Señora nian) nu’udar área ho interese relijiozu ba maioria povu Timor-Leste ne’ebé tama ona iha roteiru baibain, ba turista lokál no estranjeiru sira.

Maibé, tuir Prezidente Repúblika, área rua ne’e tama ona iha risku lakon nia furak natural, rai mamuk dadaun no monu dadaun ona hosi foho leten mai kraik tanba maluk sira tesi ai beibeik ba nesesidade lor-loron nian.

Enkuantu, Marabia nu’udar fatin ne’ebé aswa’in sira fó fali sinál katak iha luta libertasaun nasionál sei moris hela. Sinál dahuluk ne’e fó iha 10 juñu 1980 ho atake ida iha Marabia molok konferénsia dahuluk hala’o iha Maubai, Rejiaun Sentrál, tinan 1981, atu reorganiza fali rezisténsia nasionál.

Nune’e, presiza tau espesiál ba fatin istóriku sira ne’e. Iha ne’ebá (Marabia), rai monu dadaun ona tanba populasaun tesi ai arbiru.

Loron ohin iha fatin tolu ne’e, konsege kuda ai-oan liu rihun ida ho espési oi-oin hanesan ai-matan dukur, ai-kafé, ai-kakeu no sel-seluk tan.

Ai-oan sira ne’ebé kuda iha área Estátua João Paulo II no Golgota sei hetan domin espesiál hosi eskuteiru sira, lideransa komunitária ho populsaun lokál no ida ne’ebé kuda iha Marabia sei hetan domin espesiál hosi líder komunitária no populasaun lokál.

Partisipa iha kampaña refere maka hanesan, Prezidente Tribunál Rekursu, Deolindo dos Santos, Xefe Estadu Maior Jenerál F-FDTL, Lere Anan Timur, Minisitru Agrikultura no Peskas, Joaquim dos Reis Martins, Adjuntu Prokuradór Jerál Repúblika, Afonso Lopez, eis Prezidente PN, Vicente Guterres, Prezidente Komisaun Funsaun Públika, Faustino Cardoso, Estudante Hadomi Natureza, Akadémika Hadomi Natureza, Asosiasaun Nasionál Hadomi Natureza, Jerasaun Hadomi Natureza, Adventure Timor-Leste no Juventude Mahein Ramelau, funsionáriu sira hosi Ministériu Negósiu Estranjeiru, Ministériu Agrikultura no Peskas, padre, estudante sira no sel-seluk tan.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here