Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu lidera hosi Primeiru-Ministru, Taur Matan Ruak, hamutuk ho membru Konsellu interministeriál ba protesaun sivíl no jestaun dezastre naturál, ohin kontinua diskute polítika nasionál ba jestaun dezastre.

 “Ohin enkontru ne’ebé inisia hosi Primeiru-Ministru ho komisaun interministeriál ida, liuliu hodi haree liu kona-ba dezastre naturál”, hatete Sekretáriu Estadu ba Protesaun Sivíl, Alexandrino de Araújo, ba jornalista sira iha Palásiu Governu.

Nia dehan rezultadu enkontru deside Ministériu Administrasaun Estatál maka sei lidera konsellu ne’e durante mandatu governasaun tinan lima.

Iha biban hanesan, Ministru Administrasaun Estatál em ezersísiu, Abílio José Caetano, hatete enkontru ne’e atu kria liután komisaun tékniku iha ministériu relevante ne’ebé involve iha konsellu ne’e.

“Ida ne’e atu bainhira akontese dezastre ami deside uluk iha nivel tékniku hodi fó asisténsia iha primeiru sokoru apoiu ai-han, saúde no depois maka apoiu ba uma aat, maibé buat balun ne’ebé difisil atu foti desizaun maka ami lori konsellu interministeriál”, dehan nia.

Dadus vítima dezastre naturál hosi munisípiu 11 rekolla ona iha munisípiu Baukau hamutuk 400 resin, Vikeke 200, Lautein 80 no munisípiu sia mak Dili no Rejiaun Administrativa Espesiál Ambenu-Oekusi (RAEOA) iha prosesu verifikasaun.

Hosi totál dadus dezastre ne’ebé akontese iha munisípiu parte leste, governu foin verifika uma kain kuaze 50 hodi hetan apoiu rekoperasaun ba materiál konstrusaun, enkuantu seluk sei kontinua iha prosesu.

Tuir polítika intervensaun governu iha parte rua, primeiru maka intervensaun emerjénsia hodi fó asisténsia ba liuhosi distribuisaun nesesidade bázika hanesan foos, mina, ekipamentu tein, lona, supermie, no parte segundu rekoperesaun materiál hanesan kalen, simentu, ai, pregu, besi no osan mao de obra.

Prosesu distribuisaun materiál konstrusaun, tuir relatóriu hosi Ministériu Solidaridade Sosiál Inkluzaun (MSSI) katak estok hotu, tanba ne’e sei hein alokasaun orsamentu 2019 hodi sosa.

“Parte Baukau, liuliu Kelikai simu ona apoiu emerjénsia, Baguia, mota lori ema nain tolu iha Bebui, Vikeke, dezastre ai hanean ema iha Ermera no dezastre seluk lor-loron dadus tama hela”, dehan governante.

Membru governu ne’ebé involve iha konsellu ne’e bazea ba rezolusaun governu númeru 03/2019, de 16 de janeiru 2019 hodi estabelesementu membru konsellu interministeriál ba protesaun sivíl no jestaun ba dezastre naturál kompostu hosi Ministru Administrasaun Estatál, Ministru Defeza, Ministru Interinu, Ministra Finansa Interina, Ministru Negosiu Estranjeiru no Kooperasaun, Ministra Saúde Interina, Ministru Obra Públika, Ministru Transporte no Komunikasaun, Ministra Solidaridade Sosiál no Inkluzaun, Ministru Agrikultura no Peska no diretór sentru integradu ba jestaun krize.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here