Sekretáriu Estadu Komunikasaun Sosiál (SEKOMS), Merício Juvenal dos Reis Akara, sorumutu ho ekipa tékniku hosi Xina iha Palásiu Governu, ohin. Imajen Egas Cristovão

DILI, (TATOLI) – Ekipa teknika hosi Xina, ohin atualiza fali informasaun ba governu liuhosi Sekretáriu Estadu Komunikasaun Sosiál (SEKOMS), Merício Juvenal dos Reis Akara, kona-ba prosesu dijitalizasaun ba mídia públiku, Rádiu no Televizaun Timor-Leste, Emprensa Públika (RTTL-Ep).

Sekretáriu Estadu Komunikasaun Sosiál, Merício Juvinal dos Reis “Akara” informa, hafoin enkontru ho ekipa husi Xina, katak durante enkontru ohin dader ne’e sira ko’alia kona-ba oinsa atu asina akordu. Tuir regra, prosesu asina akordu ne’e, Embaixada Xina iha Timor-Leste ho Ministériu Negósiu Estranjeiru no Kooperasaun (MNEK) mak sei asina.

“Aban hanesan ne’e, embaixada Xina ho parte ita nian, Ministériu Negósiu Estranjeiru no Kooperasaun ho SEKOMS sei hasoru malu fali atu ko’alia kestaun tékniku”, Akara ba jornalista sira iha Palásiu Governu, hafoin sorumutu.

Nia hatutan: “Ita sei deside data bainhira mak atu asina. Sei anunsia mós ba media sira kona-ba asina ne’e”.

Governante ne’e mós haktuir Xina ho governu Timor-Leste durante ne’e ko’alia no diskute hodi to’o ona iha konkordánsia ida. Nune’e mós, governu liuhusi SEKOMS, akompañadu ho diresaun tékniku RTTL-Ep nian vizita Xina no haree direta oinsá prosesu no funsionamentu dijitalizasaun.

“Ita aseita, konkorda malu ona. Entaun agora ne’e to’o nivel entre Ministériu Negósiu Estranjeiru ita nian no embaixada Xina, tuir regra. Kestaun téknika sira ne’e parte rua aseita ona, la iha ona diferensa”.

Hasoru malu ne’e, involve mós Prezidente RTTL, EP, Francisco da Silva Gary, Xefe Gabinete SEKOMS inklui asesór sira balun.

Notísia relevante; http://www.tatoli.tl/2018/09/dijitalizasaun-rttlep-sei-akontese-2019/

http://www.tatoli.tl/2018/08/xina-atualiza-apoiu-dijital-rttl-ep-ba-sekoms/

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here