Sekretáriu Estadu Ambiente (SEA), Demétrio do Amaral de Carvalho, entega sertifikadu lisensa ambientál ba Diretór Nasionál Estrada, Ponte no Kontrolu MOP, Milton Ramanata de Castro Monteiro. Foto/SEA.

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, ohin emite ona sertifikadu lisensiamentu ambientál ba kompañia hamutuk 24.

“Lisensa ba kategoria boot sira maka Baukau-Lautein, Maubara-Karimbala, Atabae-Mota-Ain no Dili Manatutu, ne’e lisensa sira ne’ebé importante ba estrada nasionál no espera ema ne’ebé hetan linsensa sira (titulár) bele hala’o sira-nia atividade dezenvolvimentu di’ak no bazea ba rekomendasaun sira ne’ebé husi autoridade ambientál emite ona”, Demétrio afirma iha Bebora, ohin.

Lisensiamentu ambientál ne’ebé entrega ne’e iha operadór sira kompañia internasionál, maibé projetu sira ne’e Estadu nian nomós iha projetu balun ho karater empreza hanesan Heineken.

“Implementasaun kuandu empreza sira ne’ebé hetan lisensa sira hahú halo atividade, ezemplu, reabilita dalan ka konstrusaun estrada foun ka atividade indústria bainhira sira hala’o bazea ba lisensa ne’ebé fó, ami iha obrigasaun hodi halo inspesaun regulár, monitorizasaun hodi garante katak se sira halo violasaun ruma ba rekomendasaun ne’ebé hasai tuir lisensa ne’ebé fó, ita sei halo notifikasaun ba sira bainhira halo notifikasaun dalarua, dalatolu sira lahalo tuir ita halo prosesu seluk ne’ebé bele impoen Estadu nu’udar entidade ne’ebé kontrola prosesu”.

Eis deputadu ne’e salienta ba projetu sira ne’ebé lahanesan iha rekizitu ne’ebé diferente ba sira, ezemplu, reabilitasaun estrada ka konstrusaun tenke halo tratamentu hodi redús poluisaun, sira tenke iha mekanizmu hodi halo mitigasaun ba problema ambientál, rega rai-rahun sira, evita tesi ai sira ne’ebé lanesesáriu, ko’a foho karik tenke hatene nia inklinasaun nune’e labele ko’a foho ida ne’ebé rai-henek maka barak liu, ko’a foho ne’e haliis tebes, udan xuviska de’it rai monu, sira ne’e hotu iha lisensa no SEA sempre fó rekomendasaun atu sira hatene halo mitigasaun ba problema sira ne’e.

Demétrio hatutan SEA halo notifikasaun balun bainhira halo inspesaun ba estrada Dili-Manatutu ne’ebé iha kazu ne’e reprezenta Ministériu Obra Públika no simu resposta balun husi sira no balun seidauk iha resposta, maibé SEA hakarak atu serbisu ambinte besik liu ho komunidade bainhira iha keixa ba projetu ruma husi sira, ekipa tenke to’o kedan iha baze hodi klarifika problema ne’e tanba saida.

“Se problema ne’e iha relasaun ho projetu, haree iha lisensa ona ka la’e? Se iha lisensa ona haree rekomendasaun saida maka ita fó hodi hadi’a prosesu sira ne’e hotu”.

Lisensa ambientál ne’ebé ambiente emite ba titulár sira hotu tenke hatene regra no uza ho didi’ak, evita atu labele akontese dezastre ba natureza no problema ambientál ba nasaun ne’e. Lisensa ne’ebé fó ne’e ho durasaun tinan rua depois empreza sira renova.

Kona-ba empreza balun ne’ebé seidauk hetan lisensa ambientál, maibé halo ona projetu, Demétrio dehan sira halo ona notifikasaun no prosesu tanba ohin loron empreza barak maka ladauk hetan lisensa no balun hahú hatama dokumentu.

Lisensiamentu ambientál nu’udar dalan ida ne’ebé Governu Timor-Leste foti hodi asegura dezenvolvimentu sira ne’ebé la’o iha país ne’e atu minimiza impaktu ambientál no salvaguarda biodiversidade, rikusoin ne’ebé iha tasi no foho tanba ne’e presiza duni molok projetu sira la’o hahú ho lisensa ambientál.

Tuir lei baze ambiente 2012 artigu 15 hatete projetu boot sira ne’ebé la’o antes hetan lisensa ambientál ne’e hatudu inkumprimentu ba lei ne’e nomós prosedimentu sira iha dekretu lei lisensiamentu ambientál númeru 5/2011 ne’ebé hatudu faze sira ba tratamentu lisensiamentu ambientál.

“Ema balun hanoin ambiente ho prosesu lisensiamentu ambientál atu halo barreira ba dezenvolvimentu. Ha’u hanoin prespetiva ne’e tenke muda, ambiente lamai sai sasátan ba dezenvolvimentu”.

Diretór Nasionál Estrada, Ponte no Kontrolu Ministériu Obra Públika (MOP), Milton Ramanata de Castro Monteiro, hatete husi MOP bele hetan ona lisensa ba reabilitasaun estrada sira ne’e.

“Lisensa ne’e hanesan rekizitu ida importante liuliu iha Banku Aziátiku (ADB) ho fundu empréstimu ne’ebé ita ho doadór sira ne’e primeiru rekizitu ne’ebé iha maka ambiente ne’e. Sira hato’o karta lubuk ida mai iha Obra Públika kestaun mak ambiente. Ambiente  ne’e bainhira maka imi bele kumpre buat sira ne’e hotu tanba ida ne’e mós fó impaktu ba prosesu halo estrada ne’e rasik. Se lisensa ida ne’e maka laiha entaun sira sei blokeia pagamentu kona-ba prosesu projetu ne’e sira sei bele hapara”.

Tanba ne’e MOP agradese tebes tanba SEA fó ona lisensa ida ne’e no bá oin MOP sei iha pakote ida ka rua ne’ebé persiza asisténsia SEA nian hanesan estrada Baukau-Vikeke nian.

Lisensiamentu ambientál  ne’ebé entrega ba kompañia 24 ho nia kategoria A ida, B haat no C 19.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here