Jerente Nasionál ConocoPhillips, José Lobato Gonçalves, bainhira loke formasaun faze daruak iha sentru nasionál formasaun profesionál no empregu, Tibar, munisípiu Likisa, ohin. Imajen Agapito dos Santos

DILI, (TATOLI) – Kompañia internasionál hosi Amerika, ConocoPhillips, apoia orsamentu dollar milliaun rua ba programa formasaun profesionál iha área elétrika no instrumentasaun.

“Ida ne’e faze daruak, formasaun vokasionál ne’ebé halo kooperasaun entre Bayu Undan reprezenta hosi ConocoPhillips ho ANPM (Autoridade Nasionál Petróleu no Minarai) nomos SEFOPE (Sekretariu Estadu Profesionál no Empregu)”, haktuir Jerente Nasionál  ConocoPhillips, José Lobato Gonçalves, bainhira loke formasaun faze daruak iha sentru nasionál formasaun profesionál no empregu, Tibar, munisípiu Likisa, ohin.

José Lobato Gonçalves hatutan: “Ita halo ona primeira faze no hetan ona graduasaun hosi ema nain 18, sira maioria hetan servisu  no balun iha faze estájiu ho susesu, primeiru faze ne’e maka ita avansa ba faze daruak”.

Projetu ne’e implementa hosi Sentru Nasionál Empregu no Formasaun Profesionál no CEGELEG Oil durante tinan ida, iha faze teoria fulan tolu no prátika fulan sia.

Jerente ba kompañia internasionál ne’e konsidera formasaun iha área ne’e importante hodi fó oportunidade ba foinsa’e timoroan sira hodi hasa’e abilidade no koñesementu tékniku valiozu iha manutensaun elétrika no instrumentasaun.

Ho rezultadu iha primeira faze maka Governu tenke kontinua investe osan  iha programa ne’e, tanba  ConocoPhillips sei remata kooperasaun ne’e iha 2019.

“Hanesan kompañia iha 2022 sei remata nia servisu iha Timor bainhira produsaun mina iha Bayu Undan remata, tanba ne’e governu labele depende ba kompañia maibé tenke haree programa di’ak ne’e la’o ba oin atu labele mate iha klaran”, akresenta.

Iha formasaun faze ikus ne’e kompañia mós oferese orsamentu insentivu ba formadór timoroan sira hodi aprende iha área lian-inglés no área eléktrika.

Formasaun ne’e parte ida prepara joven sira hodi emprega ba merkadu servisu, tanba rekursu iha área téknika iha rai-laran sei menus.

“Ha’u gosta programa ida ne’e, tanba prepara rekursu umanu iha Timor ne’e sei menus, ohin loron bainhira ita atu hadi’a uma sei bolu ema Indonézia no Filipina, ho ida ne’e maka ita presiza atu forma timoroan sira”, realsa tan.

Diretór Jeral SEFOPE, Paul Alves, hatutan rezultadu formasaun faze dahuluk iha tinan kotuk rezulta formandu nain ualu maka servisu ona no restu sei iha faze estájiu ba kontratu.

“Ita tenke reforsa iha formasaun ne’e, tanba ba futuru indústria avansadu ona, formandu sira bele responde númeru iha merkadu, alende ne’e formandu sira bainhira remata bele sai instrutór hodi apoia sustentabilidade formasaun iha área elétrika no instrumentasaun hodi fó fali formasaun ba foinsa’e sira tuir mai bainhira ita nia akordu ho ConocoPhillips remata”, katak.

Matéria formasaun hot-hotu introdús ho lian-inglés hanesan competence assurance management (jestaun garantia kompeténsia) kompostu hosi analiza formasaun analiza ba nesesidade treinamentu (training needs analysis).

Alende ne’e kompeténsia profisaun, treinamentu tékniku (technical training) kompostu hosi elétrika no instrumentasaun (electrical and instrumentation), automasaun mekánika (automation mechanical), prosesu industriál (industrial process) no Aquecimentu, ventilasaun no ar kondisionadu (heating, ventilation, and air conditioning) nomos jestaun treinamentu (management training), treinamentu ba seguransa saúde ezekutivu (HSE training) no jestaun ba sentru treinamentu (training center management).

Kandidatu 600  hosi joven no estudante universidade iha área diferente maka tuir teste atu hetan formasaun maibé selesionadu ema nain 30 tanba difikuldade ho lian-inglés.

Formadór sira hosi sentru formasaun exelente iha mundo CEGELEC Oil ne’ebé hetan kontratu hosi  kompañia ConocoPhillips.

Entretantu, tuir dadus hosi sentru formasaun ne’e katak formandu nain ualu hosi nain 18 iha formasaun primeira faze ninian maka hetan ona kontratu hosi kompañia internasionál Pertamina, kompañia nasionál Esperansa Timoroan.

Prezidente ANPM, Gualdino do Carmo, liuhosi komunikadu imprensa ne’ebé distribui ba jornalista sira enkoraja formandu sira ba faze segundu nian atu partisipa hodi hetan susesu iha formasaun.

Nune’e agradese mós ba kompañia ConocoPhillips ho ninia konsórsiu sira ne’ebé fó ona apoia finanseira ba programa ne’e.

“ANPM iha kompromisu atu servisu kontinuamente ho kompañia no prestadór servisu sira iha área mina no gás nian parte intersadas atu kria oportunidade barak liután hodi prepara di’ak liután sidadaun sira ne’ebé selesianadu hodi hetan abilidade no koñesmentu importante nesesáriu ba empregu aban bainrua iha indústria mina no gás no industria seluk”, dehan Gualdino.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here