Ezemplu kamioneta ne'ebé tula lixu. Imajen hosi google

DILI, (TATOLI) – Xefe Departamentu Saneamentu Munisípiu Dili, Domingos dos Santos Soriano, hatete ba tinan 2020, Timor-Leste la uza ona manuál hodi hili lixu maibé hahú ona rekolle lixu ho mákina moderna hanesan mós Austrália inklui nasaun seluk.

“Ba 2020 ita sei la raut lixu ho manuál ona, hothotu uza ekipamentu moderna hanesan mós nasaun Austrália no nasaun boot sira seluk”, Domingos dos Santos ba Tatoli iha nia servisu fatin Administrasaun Munisípiu Dili, Matadouro, ohin.

Tanba ne’e, iha tinan agora, nia dehan sei halo hela preparasaun atu loke konkursu hahú iha agustu to’o setembru, nune’e bele hahú ona sosa ekipamentu, no iha janeiru 2020 kompañia bele hala’o ona servisu ho di’ak.

Ba konkursu públiku ne’e, kompañia timoroan no estranjeiru bele hola inisiativa hodi aplika, nune’e bele kaer projetu ida ne’e hodi halo servisu ne’ebé efetivu no efisiénsia ho uzu materiál sira moderna.

Hanesan baibain, ema hotu tenke tau lixu iha nia fatin hafoin mákina mak ba foti hodi ba fakar iha lixeiru. Oráriu raut lixu hahú tuku 6:00 dader to’o tuku 13:00.

Diferénsia uza manuál ho moderna, nia esplika bele uza ekipamentu manuál maibé servisu mak lentu, enkuantu uza mákina moderna bele lais liu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here