Enkontru entre Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur ho Prezidente Repúblika, Francisco Guterres Lú Olo. Imajen Mídia Palásiu PR.

DILI (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Lere Anan Timur, observa tenke haree hosi parte pozitivu no negativu ba panorama veta ka promulga orsamentu jerál Estadu (OJE) 2019.

“Ita labele hotu-hotu dada ba at ka hotu-hotu dada ba di’ak. Veta mós vantajen sempre iha no dezvantajen mós iha. Promulga mós ninia di’ak iha no ninia ladi’ak mós iha,” Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho polémika promulga no veta OJE 2019.

Tanba ne’e, nia dehan, entrega ba Prezidente Repúblika (PR) atu deside oinsá tanba ne’e kompeténsia própriu Prezidente Repúblika.

“Nu’udar umanu ita tenke respeita malu no nu’udar instituisaun nia ema ita tenke respeita ema ida-idak nia kompeténsia,” nia esplika.

Ba militár no polísia, Lere husu, importante hahán tenke iha no vensimentu tenke iha.

“Ha’u uluk ko’alia beibeik ona katak laiha dezenvolvimentu, laiha estabilidade. Maibé, ha’u fiar katak ita nia lider sira sei jere situasaun hanesan sai di’ak,” eis lider rezisténsia ne’e haktuir.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here