Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur.Foto António Goncalves

DILI (TATOLI)–Xefe Estadu Maiór Jenerál FALINTIL (F-FDTL), Lere Anan Timur, preokupa ho movimentu artes marsiais iha rai laran.

“Iha konfrontu entre membru artes marsiais iha Baguia (Baucau), Laga no Baucau Vila, maibé ladún grave,” Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin levanta situasaun seguransa rai laran ba Prezidente Repúblika, Francisco Guterres Lú Olo.

Nia hateten Estadu no Governu tenke toma desizaun ida no labele husik de’it hanesan ne’e.

“Hanesan sosiedade sivíl no Parlamentu ko’alia nó mós uluk iha kampaña partidu polítiku sira hato’o kompromisu ida katak bainhira ukun tenke hadi’a artes marsiais. Ha’u mós hato’o ha’u nia rekomendasaun katak artes marsiais hanesan desportu ida iha kualkér parte ba mundu hanesan mós iha Timor, tan ne’e tenke rejista hanesan desportu ba Timor,” nia esplika.

Nia husu ba Governu atu halo moris fila fali artes marsiais liuhusi halo estatutu própriu, tenke iha organizasaun ne’ebé própriu, tenke iha sede no Governu mós tenke apoiu para sai desportu Timor ninian hodi kompete iha internasionál.

Tuir Lere katak bainhira taka de’it no la hetan apoiu hosi Governu, dala ruma bele halo krime nafatin.

“Ita labele fó sala ita-nia oan sira ne’e. Nu’udar aman, ita tenke buka solusaun ba sira,” nia tenik.

Kona-ba seguransa hosi polísia no F-FDTL ba iha Natal no Tinan Foun, Lere dehan, retira hotu ona tanba situasaun hakmatek.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here