Presu sa'e. Foto/Google.

DILI (TATOLI)-Diresaun Jerál Estatístika ohin lansa Índise Presu Konsumidór (IPK) Dezembru 2018 nian ne’ebé hatudu katak fulan ne’e akontese inflasaun +0.1% kompara ho Novembru tinan kotuk mós sa’e +0.2%.

Diretór Jerál Estatístika, Elias dos Santos Ferreira, informa presu sa’e (inflasaun) ne’e hetan kontribuisaun maioria husi grupu hahán no hemun (bebida) la’ós alkólika +0.4%, no alkol no tabaku +0.3%. Transporte -0.5% no ekipamentu no manutensaun mobiliáriu uma laran -0.2% sai hanesan mudansa kontrária (offset) ba inflasaun grupu hotu.

Grupu hahán no hemun la’ós alkólika sa’e hetan impaktu maioria husi sub-grupu vejetál +1.4%, susubeen, keiju no mantolun +1.3%, no foos +0.2%. Mina no bokur -0.1%, no ikan no hahán tasi -0.4% sai hanesan mudansa kontrária ba grupu hahán no bebida la’ós alkólika.

“Presu foos sa’e iha fulan ida ne’e (Dezembru-read) tanba afeta husi nesesidade agregadu no husi presu foos importasaun ne’ebé hatudu iha presu foos mundiál sa’e 4% iha trimestrál ikus tinan 2018. Iha Parte Seluk presu mina internasionál tun -28% iha trimestrál ikus tinan 2018 hodi afeta presu mina transporte iha merkadu rai-laran”, nia informa iha Kaikoli ohin.

Mudansa persentajen IPK anuál sa’e +2.1% kompara fulan Dezembru 2018 – Dezembru 2017, hetan kontribuisaun husi grupu hahán no hemun la’ós alkólika +1.5%, alkol no tabaku +11.0%, edukasaun +16.6%, transporte +3.9%, uma +0.7%, rekreasaun no kultura +0.5%, komunikasaun +0.4%. Ekipamentu no manutensaun mobiliária Uma-Laran -0.5% no hatais no Sepatu -0.1% sai hanesan mudansa kontrária ba anuál Dezembru 2018.

 Inflasaun tradable (hanesan mudansa presu produtu hotu ne’ebé iha dependénsia maka’as ba kompetisaun merkadu internasionál) 0.0% laiha mudansa no non-tradeable (hanesan mudansa presu produtu hotu ne’ebé iha dependénsia ba fatór merkadu doméstiku) +0.1% sa’e iha mensál kompara Dezembru 2018 ho Novembru 2018. Inflasaun tradable +1.7% sa’e no non-tradeable +2.0% sa’e iha anuál kompara Dezembru 2018 ho Dezembru 2017.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here