Ministru Negosiu Estranjeiru no Kooperasaun, Dionísio da Costa Babo Soares. Imajen/António Gonçalves.

DILI, (TATOLI) – Ministériu Negósiu Estranjeiru no Kooperasaun (MNEK) komprometidu hadi’a polítika esterna no dezenvolvimentu institusionál.

“Hanesan ha’u subliña bebeik, iha programa boot rua; ida mak kona-ba kondusaun polítika esterna, ida fali sobre dezenvolvimentu institusionál”, katak Ministru Negósiu Estranjeiru no Kooperasaun, Dionísio da Costa Babo Soares, ba TATOLI iha edifísiu MNEK Praia dos Coqueiros, ohin.

Governante ne’e katak alende programa boot rua ne’e, iha programa esensiál seluk mak hanesan asuntu transversál sira. Katak, kona-ba investimentu estranjeiru, kestaun liga ho asuntu bilaterál, multilaterál, ne’ebé mak besik liu ho aspetu sira hanesan koordenasaun ho orgaun espesífiku sira.

Hanesan Timor-Leste, Indonézia, Austrália (TIA) dialógu, koordenasaun ho gabinete G7+ nian, ita-nia intensaun atu tama iha Organizasaun Nasaun sira iha Sudeste Aziátika (ASEAN-sigla inglés), intensaun atu estabelese ou halo parte membru Organizasaun Komérsiu Mundiál (WTO-sigla inglés) nian.

“Ida ne’e sai hanesan aspetu importante ne’ebé mak halo parte iha kontinuasaun programa 100 di’as”, katak Babo Soares.

Rezultadu serbisu loron atus ida MNEK nia destaka iha kapítulu neen ne’ebé dekreve kona-ba kompeténsia, atividade (relasaun internasionál no polítika esterna), dezenvolvimentu institusionál, hahú husi pájina 85 to’o 91, entre pájina 236, retratu loron 100 governasaun, sura hahú 22 juñu to’o 22 setembru 2018.

Programa governu nian ba périodu 2018-2023 iha ámbitu MNEK nian deskreve iha pájina 128 to’o 134. Programa ne’e rasik aprovadu iha Konsellu-ministru ho data 20 jullu 2018.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here