Foto espesiál

DILI, (TATOLI) – Tempu badak, ekipa “Fact Finding” Organizasaun Nasaun sira iha Sudeste Aziátika (ASEAN-sigla inglés) sei mai Timor-Leste hodi avalia prontidaun Timor-Leste nian bazea ba pilár tolu hanesan defeza, seguransa no polítika, ekonomia nomós sosiál no kulturál hodi deside nasaun ne’e sai mós membru definitivu.

“Ita hatene katak ekipa ‘fact finding’ sei mai iha fulan hirak nia laran, depende ba desizaun husi ASEAN”, hateten Ministru Dionísio Negosiu Estranjeiru no Kooperasaun, Dionísio da Costa Babo Soares, ba TATOLI iha edifísiu MNEK, Praia dos Coqueiros, ohin.

Ministru espera tinan ne’e ASEAN hatan Timor-Leste nia pedidu hodi sai membru. Tanba, TL hato’o aplikasaun tinan 10 ona. Katak aplika dezde 2009 to’o agora.

“Se ASEAN sei dada nafatin, ita mós tenke, hanesan país soberanu, ita reformula ita-nia polítika hodi haree, sei bele ka la’e mantein nafatin hanesan prioridade”, afirma.

Governante ne’e haktuir MNEK hala’o ona koordenasaun ho ministériu sira hotu. Inklui, horiseik Diresaun ASEAN, MNEK nian hala’o enkontru ho embaixadór ASEAN sira hotu, ne’ebé mak nia rezidénsia iha TL hanesan Indonézia, Filipina, Malázia no Brunei Darussalam hodi fortifika TL nia intensaun no preparasaun. “Ita espera katak fim-do-ano ida ne’e ASEAN responde”.

Iha fatin hanesan, Embaixadór Indonézia ba TL, Sahat Sitorus, iha ámbitu ko’alia kona-ba preparasaun TL, liliu kona-ba TLAMP (Programa Mobilizasaun Timor-Leste ba ASEAN) nian, horseik, hateten Indonézia, inklui Filipina, Indonézia, Malázia, Singapura, Tailándia, Brunei Darussalam, Vietnam, Laos, Myanmar no Kambodia apoiu Timor-Leste nia pedidu adezaun, Singapura mak sei nafatin fó pergunta.

“Ha’u resik sente iha nia di’ak, atu ita prepara án liután, nune’e ita hatene bainhira sai membru ASEAN, molok deside sai membru ASEAN, Timor-Leste prontu loloos duni. Importante liu mak kona-ba regra negósiu sira, regulasaun sira nomós preparasaun fasilidade; fasilidade enkontru maibé mós nia emar sira”, katak Sahat Sitorus.

Entretantu, bainhira desizaun ASEAN deside Timor-Leste hodi sai membru ofisiál ho direitu pleno ba organizasaun ne’e, mak membru ASEAN sei kompostu husi nasaun 11 husi nasaun membru definitive 10 hanesan Filipina, Indonézia, Malázia, Singapura, Tailándia, Brunei Darussalam, Myanmar, Vietname no Kambodia.

ASEAN funda iha Bankok, kapitál Tailándia, iha loron 8 agustu 1967 ho país fundadór sira mak hanesan Indonézia, Malázia, Singapura, Filipina no Tailándia.

Nia objetivu mak hasa’e kresimentu ekonomia, dezenvolvimentu sosiál no kulturál iha nasaun membru ASEAN, garante pás no estabilidade iha nivel rejionál nomós promove oportunidade atu ko’alia diferensa sira iha nasaun membru ho maneira pasífika.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here