Ministru Agrikultura no Peska, Joaquim José Gusmão dos Reis Martins. Foto/MAP.

DILI, (TATOLI) – Ministru Agrikultura no Peska, Joaquim José Gusmão dos Reis Martins, husu tulun ba autoridade lokál, administradór munisípiu, populasaun sira atu apoia Sensu Agríkola 2019 hodi bele la’o ho di’ak.

“Ha’u hakarak husu ita-boot sira-nia ajuda, tanba sensu ne’e sei hala’o bá to’o iha ita-nia populasaun”, hatete ministru iha ámbitu enkontru sobre preparativu ba Sensu Agríkola iha Komoro, ohin.

Nia hatutan tan: ” tanba ne’e maka populasaun tomak, apoiu tomak komesa husi xefe aldeia, xefe suku mai to’o administradór postu to’o prezidente munisípiu sira nomós ita-nia estensionista sira ne’ebé maka iha kampu, diretór agrikultura iha munisípiu, ha’u husu ajuda ba ita-boot sira bele apoiu ho másimu para sensu ne’e bele la’o ho di’ak”.

Nia konfesa maski iha preokupasaun kona-ba orsamentu, maibé husu atu ida ne’e labele sai razaun para labele hala’o sensu no ministru sempre iha hanoin pozitivu katak orsamentu sei promulga nomós sensu ne’e sei hala’o.

“Iha nivel polítika ami halo buat hotu para bele realiza sensu ne’e iha tempu ne’ebé maka ita determina ona, tanba ne’e husu ajuda ba ita-boot sira kuandu ita komesa ona ita-nia sensu iha marsu iha kampu ne’ebá ita-boot sira bele koopera ho di’ak, bele fó apoiu tomak ho autoridade lokál, PNTL, F-FDTL, sira ne’ebé maka iha kampu ne’ebá para ita bele hetan rezultadu ne’ebé másimu husi ita-nia populasaun tomak”.

Ministru salienta ida ne’e la’ós fásil tanba Sensu Agrikultura foin hala’o ba dahuluk iha Timor-Leste no sei enfrenta buat barak iha terrenu bainhira sensu ne’e hahú.

“Tanba ne’e Sensu Agríkola la’ós (sensu) umakain, nia pergunta sira sei espesífika ba ida ne’e. Tanba ne’e husu ajuda ba ita-boot sira bele esplika ba ita-nia povu katak Sensu Agríkola ne’e importante tebes para Governu liuliu Ministériu Agrikultura bele uza ninia rezultadu hanesan baze para halo planu di’ak liután ba setór agrikultura”.

Iha okaziaun ne’e ministru husu ba agrikultór sira iha territóriu tomak atubele suporta, fó asisténsia bainhira ekipa téknika tun halo sensu hodi bele hetan dadus ida kredivel ne’ebé reprezenta agrikultura en jerál hodi nune’e trasa planu no halo polítika ida di’ak ba dezenvolvimentu agrikultura iha Timor-Leste.

“Ita-nia dezenvolvimentu agrikultura depende mós ba dadus sira ne’ebé ita justifika para ita trasa planu ho polítika agrikultura nia bá oin”.

Administradór Munisípiu Bobonaru, Zeferino Soares dos Santos, afirma prontu atu koopera hodi bele halo susesu programa ne’e bá oin.

“Ita ajuda Governu atu haree ba planu ne’ebé di’ak liu kona-ba situasaun reál ne’ebé ita-nia komunidade maioria kuaze porsentu 80 maka moris ho agrikultura entaun dalaruma ita lahatene iha parte ida ne’ebé maka presiza atensaun Governu nian ne’ebé ita agradese tebes ba polítika ne’e”.

Vise Prezidente Sensu Agríkola 2019, Claudino Ninas Nabais, hatete agrikultura área ida ne’ebé importante tebes, nia envolvimentu 89.9% ne’ebé agrikultór sira envolve iha atividade agríkola bazea ba sensu populasaun 2015 no Timor-Leste hanesan nasaun ida independente ne’ebé iha responsabilidade para implementa sensu ida ne’e bazea ba rekizitu internasionál nomós país ne’e seidauk iha informasaun ne’ebé estruturada husi dadus agríkola ne’ebe durante ne’e iha.

“Ho ida ne’e maka ita presiza implementa sensu ida ne’e para Sensu Agríkola sei kontribui informasaun lubuk ida para sai hanesan baze ida hodi ajuda Governu hodi halo polítika ida di’ak liután”

Sensu ne’e sei realiza husi Ministériu Agrikultura no Peska, Ministériu Finansa no hetan suporta maka’as husi Food and Agriculture Organization iha Timor-Leste.

Jornalista: Maria Auxiliadora  

Editora: Rita Almeida

HAKEREK NO HATÁN

Please enter your comment!
Please enter your name here