Embaixadór Indonézia iha Timot-Leste, Sahat Sitorus. Foto FB Sahat Sitorus

DÍLI, (TATOLI)-Governu no estadu Indonézia kompromote kontinua apoiu Timor-Leste, nu’udar nasaun viziñu, hodi sai membru ho diretu plenu ba organizasaun aziátika, ASEAN (Association of South East Asian Nation).

“Ba Indonézia, klaru de´it katak ita apoia nafatin. Nunka kotu atu fó apoiu Timor-Leste sai membru,” hateten embaixadór Indonézia ba Timor-Leste, Sahat Sitorus, ba jornalista sira, iha edifísiu Ministériu Negósiu Estranjeiru no Kooperasaun (MNEK), Praia dos Coqueiros-Díli, ohin dader.

Diplomata ne’e dehan katak husi membru ASEAN 10 hanesan Filipina, Indonézia, Malázia, Singapura, Tailándia, Brunei Darussalam, Vietnam, Laos, Myanmar no Kambodia, ezemplu; Singapura mak sei nafatin fó pergunta.

“Ha´u rasik sente iha nia di´ak, atu ita prepara aan liután, atu nune´e ita hatene bainhira sai membru ASEAN, molok deside sai membru ASEAN, Timor-Leste prontu loloos duni. Importante liu mak kona-ba regra negósiu sira, regulasaun sira nomós preparasaun fasilidade; fasilidade enkontru maibé mós nia emar sira,” konsidera diplomata Sahat Sitorus.

Emar sira ne’e, tuir Embaixadór Sahat Sitorus, presiza dezignadamente, hanesan hato´o ona durante enkontru informál ohin, kona-ba TLAMP (Programa Mobilizasaun Timor-Leste ba ASEAN-sigla inglés) katak dalaruma iha julgamentu balun iha ASEAN, fó fiar ba peritu sira, ne´ebé dalaruma husi membru Parlamentu; eis-ministru, eis-diplomata sira akompaña Timor-Leste.

“Karik, nu´udar asesór ba delegasaun ka advisór tanba povu hotu presiza envolvidu,” Embaixadór Sahat Sitorus konsidera.

Seluk, tuir Embaixadór Sahat Sitorus katak universidade ka eskola, rekursu umanu nomós mídia sira presiza envolve ativu.

Universidade sira loke programa estudu kona-ba ASEAN. “Nune´e povu sira hatene no komprende, bainhira sai membru ASEAN ne´e; DOES, saida mak tenke halo no DONT saida mak labele halo. Ida ne´e importante,” hateten diplomata ne’e.

“Maibé, importante mak bainhira “Fact Finding” mai, lori pergunta, ita bele resposta. Provizoriamente, dadaun ne´e, tinan kotuk, ami husi Indonézia bolu reprezentantivu permanente husi Jakarta, fó koñesimentu,” nia reforsa tan.

Komprimísiu Indonézia hodi kontinua apoiu Timor-Leste sai membru ASEAN ne’e, hato’o mós husi Diretór Jerál Asuntu ASEAN, MNEK Indonézia nian, José Tavares, tuir informasaun ne’ebé públika iha portál Ajénsia Notísia Indonézia, www.Antaranews.com , ne’ebé publika iha loron 11 dezembru 2018.

Notísia ne’e mak; https://www.antaranews.com/berita/776931/indonesia-membantu-timor-leste-menjadi-anggota-asean

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here