Ministru Transporte no Komunikasaun, José Agustinho da Silva, no Ministru Transporte Repúblika Indonézia, Budi Karya Sumadi, segunda ne’e iha Jakarta, asina ona nota entendimentu iha área transporte aéreu ho objetivu hasa’e kualidade kompañia aéreu nasaun rua. Imajen DepHub Indonézia

DILI, (TATOLI) – Ministru Transporte no Komunikasaun, José Agustinho da Silva, no Ministru Transporte Repúblika Indonézia, Budi Karya Sumadi, segunda ne’e iha Jakarta, asina ona nota entendimentu iha área transporte aéreu ho objetivu hasa’e kualidade kompañia aéreu nasaun rua.

Haktuir iha pájina ofisiál Ministériu Transporte Repúblika Indonézia, Ministru Budi Karya, hateten enkontru ho ninia omólogu ne’e hodi ko’alia liu kona-ba transporte aéreu hodi bele hasa’e kresimentu ekonómiku, komérsiu no turizmu entre Timor-Leste (TL) no Indonézia.

“Enkontru ne’e, alende bele hasa’e kresimentu ekonómiku, iha mós esperansa hodi bele hasa’e kapasidade rekursu umanu nasaun rua ne’e”, tenik Budi Karya.

Antes ne’e, Ministru José Agustinho bainhira iha sesaun plenária debate urjente kona-ba kestaun transporte aéreu foin lais ne’e, hateten tempu badak sei desloka ba Indonézia hodi hasoru ministru tutela transporte hodi solusiona kestaun seguransa ba pasajeiru no folin billete.

“Atu solusiona asuntu rua ne’e, aviaun ne’ebé hetan problema tékniku tutuir malu no folin billete mak sa’e, Ministériu Transporte no Komunikasaun iha ona planu, tempu badak sei desloka ba Indonézia para diskute kestaun transporte aéreu ho ministru tutela Indonézia hodi bele hetan solusaun ne’ebé mak di’ak no dignu”, dehan José Agustinho antes ne’e.

Liuhosi enkontru ne’e, iha ona akordu katak bainhira iha loron ida mak iha demanda merkadu kapasidade transporte nasaun viziñu rua ne’e aas, bele tetu hodi aumenta.

Alen de transporte aéreu, akordu ne’e mós inklui iha edukasaun no formasaun iha setór transporte, nune’e bele aumenta koñesimentu no kapasidade rekursu umanu timoroan.

“Ministériu Transporte sei prepara programa edukasaun no formasaun avansadu, instalasaun infra-estrutura tuir nesesidade ho kapasidade no autoridade ne’ebé halo ona entre parte rua”, tenik Budi Karya.

Iha biban ne’e, partisipa Diretór Jerál Transporte Aéreu Indonézia, Polan Banguningsih, Prezidente Ajénsia Dezenvolvimentu Rekursu Umanu Transporte, Umiyatun Hayati, Xefe Gabinete Ministériu Transporte no Komunikasaun (MTK), Alvaro da Silva no Prezidente Aviasaun Sivíl, Ana Rosália Ximenes.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here