Membru hosi Movimentu Asucai Lorosa’e (MAL) hasai foto hamutuk ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, hafoin inkontru ramata. Imajen Mídia PR

DILI, (TATOLI) – Movimentu Asukai Lorosa’e (MAL) enkoraza Prezidente Repúblika, Francisco Guterres Lú Olo, atu forsa nafatin hasoru presaun hosi ema ruma.

“Hosi enkontru ne’e jeralmente substánsia rua maka ami hato’o nu’udar sidadaun no sosiedade ida reprezenta povu hodi mai enkoraza Prezidente Repúblika, forsa nafatin hasoru presaun no hato’o konfiansa ba Xefe Estadu atu halo nia poder polítika no konstitusionál lahó presaun hosi ema ruma”, Prezidente MAL, Justinho Ximenes, ba jornalista sira iha Palásiu Prezidente Nicolau Lobato, Bairru Pité, segunda ne’e hafoin enkontru ho Xefe Estadu.

“Segunda, rekomendasaun espesífiku, dinámika, polítika, hato’o ba lider sira atu tuur hamutuk uza dalan diálogu ba diverjénsia sira ne’ebé mosu iha tinan rua ikus ne’e”, hatutan.

MAL fiar katak laiha dúvida ba lider sira atu tuur hamutuk, tanba lider sira hotu iha fuan boot, interese nasionál hodi kontinua luta ba libertasaun povu.

MAL nu’udar organizasaun masa, ne’ebé nia membru sira mai hosi nivel intelektuál, veteranu, antigu kombatente, juventude, estudante universitáriu no entidade sira ne’ebé maka iha vontade di’ak no interese hodi fó kontribuisaun ba dezenvolvimentu nasionál liuhusi atividade sosiál, polítika no kultura.

Vizaun hosi MAL maka organizasaun ida ho kredibilidade, exelente, kria sosiedade ida ne’ebé inovativu, kontributivu, partisipativu ba dezenvolvimentu nasionál, peskiza, krítiku, sivilizadu, nasionalizmu no soberanu.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here