Prokuradór Jerál Repúblika, José da Costa Ximenes. Imajen António Goncalves

DILI, (TATOLI)-Rezultadu avaliasaun serbisu 2018 Ministériu Públiku (MP) iha retiru anuál 2018, ne’ebé realiza durante loron rua, iha otel JL. Vila Fatuhada Díli, semana kotuk nota katak númeru dezempregu kontribui mós ba akontese kazu sira hanesan violénsia iha Timor-Leste durante ne´e.

Prokuradór Jerál Repúblika, José da Costa informa katak maioria kazu, prosesu entrada ne’ebé mak agora tama iha Ministériu Públiku mak husi Díli, kapitál Timor-Leste.

“Deteta katak balun atu komesa reativa fali arte marsiál, iha mós indikasaun ida ne’e. Balun mós haree katak la’ós ida ne’e de’it, fatór dezempregu mós; labarik sira tuur iha dalan, la iha serbisu, entaun buka provoka malu. Depois ida ne’e, kazu violasaun seksuál mós aas, tuir mai mak omísidiu,” informa Prokuradór José da Costa ba jornalista sira, iha Bidau-Lecidere, Díli, sábadu (19/01), bainhira ho ekipa vizita Casa Vida.

Nia haktuir, hahú tinan 2017 prosesu sa’e oituan. Iha tinan kotuk, prosesu entrada iha rihun lima resin. Prosesu pendente iha tinan kotuk ne’e rihun tolu. Ne’e katak husi janeiru to’o 31 dezembru 2017 ne’e kazu 3000 mak pendente.

“Husi 1 janeiru to´o 31 dezembru 2018 ne´e, ita simu tan kazu 5006, akumula prosesu ne’e oito mil e tal prosesu, ita servisu durante tinan ida. Entaun haree katak tinan ida besik cinco mil e tal mak ita termina,” relata Prokuradór Jerál, José da Costa Ximenes.

Nia mós relata katak agora dadauk iha nível nasionál ne’e iha kazu 3500 nafatin. “Agora saida mak ita halo iha três meses nia laran, iha seis meses nia laran para bele aselera prosesu sira ne´e. Diresaun nasionál sira detekta problema iha ne´ebé? Ami haree ona hotu oinsa suporta ba prosesu três mil e tal”.

“Liliu Díli, tinan-tinan prosesu sa´e. Ita-boot sira hatene, uluk 2013 ne´e, prosesu três mil e tal mak tama. Agora 2018 ne´e tama cinco mil prosesu. Ami mós la halo analiza de´it ba kazu sira ne´e, tama barak halo oinsá? Ita mós identifika katak kazu ofensu korporál fíziku simples, ema baku malu, ataka malu ne´e aumenta,” akresenta prokuradór jerál.

Husi kazu sira ne’e, dala ida tan, tuir Prokuradór jerál katak sira tenta analiza, tanba saida mak kazu aumenta? Deteta katak balun atu komesa reativa fali arte marsiál, iha mós indikasaun ida ne’e. Balun mós haree katak la’ós ida ne’e de’it, fatór dezempregu mós; labarik sira tuur iha dalan, la iha serbisu, entaun buka provoka malu. Depois ida ne’e, kazu violasaun seksuál mós aas, tuir mai mak omísidiu.

“Iha tan kestaun seluk, Gabinete Kombate Korupasaun nia servisu, ami avalia ona mas, tempu, oportunidade seluk, ami bele fó fali esklaresimentu,” kompromete Prokuradór Jerál Repúblika, José da Costa hodi konklui.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here