Karreta ne’ebé tula mina ilegál. Foto/Alfándega.

DILI, (TATOLI) – Autoridade Aduaneira (AA) halo apreensaun (foti) mina ilegál ne’ebé operadór ekonómiku sira hatama mai Timor-Leste ho kuantidade jerikén 60 ka kuaze tonelada rua liuhusi operasaun ne’ebé ekipa halo.

Diretór Intelijen no Anti Fraude, Deonísio da Cruz Pereira, hatete operasaun ida ne’e kontinuasaun husi tinan kotuk tanba iha 2018 ne’e Alfándega apreende sasán lubuk ida hanesan sigarru, mina no fugete.

“Kontinuasaun husi serbisu ne’e, tanba risku ne’ebé maka importadór sira hatama sasán sein liuhusi kontrolu, entaun sasán sira ami ka’er ne’e iha kalan-boot ami halo operasaun tanba agora ne’e ami hatene katak kuandu ita halo operasaun iha loron ita sei laka’er tanba sira uza sira-nia métodu ne’e iha kalan entaun halo operasaun chek point iha área Likisá, Maubara nian kalan boot sira liu mai ami hetan mina iha laran”, Dionísio informa iha edifísiu AA, ohin.

Karreta ne’ebé tula mina ilegál. Foto/Alfándega.

Hatutan apreensaun ida ne’e la’ós haree liu de’it ba merkadoria, más bainhira ema hatama sasán iha kalan posibilidade bele hatama buat sira ne’ebé bele fó ameasa mós ba nasaun hanesan kilat no droga.

Apreesaun ba mina ne’e tula ho karreta Grand Max ho jerikén 30 no autokarru (bis Maliana) 36 ho kada jerikén iha lítru 35.

Grand Max ne’e ka’er iha sábadu tuku ida dadersán no autokarru Maliana nian iha loraik tuku haat horisehik ne’ebé fornese husi sidadaun Indonézia ida ne’ebé daudaun ne’e detein ona.

“Prosesu bá oin ami halo tiha kontajen hotu, sura tiha kalkulasaun taxa sira ne’e, sura lakon ba Estadu hira depois prosesu iha ne’e ita partisipa ba Ministériu Públiku. Ne’e regra ne’ebé maka normalmente halo”.

Deonísio hatutan informasaun sobre atividade ilegál ne’ebé ema hato’o ba Alfándega barak, maibé kestaun maka pesoál lato’o no rekursu ne’ebé maka lori atu tun ba terrenu, tanba atu halo operasaun ne’e tenke hetan informasaun husi fonte no bainhira loos ona mak foin bele halo.

“Informasaun tama, más dalaruma ami-nia ekipamentu menus inklui pesoál sira. Ne’e maka ami trasa didi’ak hodi komesa filafali operasaun, só semana, fulan sira bá oin ne’e operasaun Alfándega sei la’o nafatin hanesan tinan kotuk. La’ós haree de’it kona-ba mina, sei haree mós kona-ba esportasaun ilegál hanesan Ai-Kameli sira inklui mós sasán sira tama mai ou sai bá Indonézia sein liuhusi kontrolu autoridade”.

Sobre menus rekursu umanu, Alfándega nia área kontrola luan liu, maibé iha fatin balun laiha prezensa husi pesoál AA iha ne’ebá no ema sira ne’ebé halo atividade normalmente sira hela iha fronteira tanba, koñese malu no sasán lori bá-mai.

“Ne’ebé sira-nia rede ne’e maka’as para mate, só ita ko’alia kona-ba pesoál nia númeru mós importante, koñesimentu fronteira mós importante. Númeru bele boot, más koñesimentu fronteira kuandu laiha mós problema hotu”.

Tanba ne’e iha tinan foun Alfándega halo kontrolu maka’as ba merkadoria iha área fronteira, tanba mina ilegál sira ne’e tama barak liu la’ós iha Batugadé, maibé iha Atabae no Palaka.

“Mina sira ne’e preokupasaun no abitante sira loroloron hatete mina tama hela de’it iha ne’ebá no dehan kontrolu menus iha ne’ebá, entaun ami halo ba ami-nia operasaun ne’e haree liu kona-ba merkadoria sira ne’e”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here