DILI, (TATOLI) – Diretór Intelijen no Anti Fraude Autoridade Aduaneira (AA), Deonísio da Cruz Pereira, apela ba operadór ekonómika balun ne’ebé hatama sasán liuhusi dalan ilegál, di’ak liu tuir dalan ne’ebé loos, tanba atu fasilita komérsiu ne’e importante.

“Iha parte Alfándega nia ko’alia kona-ba regra ita impoen regra ba sira depois ita mós sosializa lei ba sira. Agora, sira komprende tiha lei no regra maka sira lakohi kumpre ida ne’e maka ita foti asaun. Hanesan tipu atividade sira ne’ebé maka sira lori mai tama kalan-boot, la’o hafuhu malu, bainhira nia la’o maka nia koko para hafuhu signifika nia hatene regra, se nia tuir hela regra ne’e nia mai malorek tuir dalan ne’ebé di’ak”, Deonísio afirma iha edifísiu Alfándega, ohin.

Tanba ne’e maka AA nia aprosimasaun mak halo apreensaun (foti sasán) no halo sosializasaun lei. “Mas ami sosializa maka lakomprende nafatin iha ikus mai maka tenke halo apreensaun”.

“Alfándega atu motiva operadór ekonómika sira ne’ebé maka atu halo (hatama sasán) mak simples de’it. Ami-nia regra maka kuandu kumpre, mai ó-nia prioridade liu ó-nia sasán sira ne’ebé tama ami tau prioridade, prosesa no sai lalais, mas kuandu mai hakarak tenta liuhusi dalan ida ne’ebé maka laloos no koko sees husi ne’ebá ami sei toos no to’o iha parte ida ó-nia negósiu bele to’o bankarota”.

Tanba ne’e husu atu tuir dalan legál atu labele prejudika sira-nia negósiu ne’ebé hala’o iha pais ne’e.

Autoridade Aduaneira (AA) foin lalais ne’e halo apreensaun (foti) mina ilegál ne’ebé operadór ekonómiku sira hatama mai Timor-Leste ho kuantidade jerikén 60 ka kuaze tonelada rua liuhusi operasaun ne’ebé ekipa Alfándega halo. Apreensaun ne’e halo tanba latuir dalan legál ka lei ne’ebé estabelese iha país ne’e.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here