Komandante Jerál Polísia Nasionál Timor-Leste (PNTL), Komisáriu Júlio da Costa Hornay. Foto Mídia PR

DILI (TATOLI)—Komandante Jerál Polísia Nasionál Timor-Leste (PNTL), Júlio da Costa Hornay, hateten to’o ohin loron situasaun en-jerál kona-ba seguransa nian iha Timor laran hakmatek no laiha kazu ida ne’ebé boot atu hetan atendementu espesiál liu.

Liga ba kazu konfrontasaun entre joven ne’ebé rezulta sunu uma iha Munisípiu Baucau, semana kotuk, nia hatán, polísia halo ona atuasaun ba kazu refere.

“Maibé problema maka bainhira akontese, ita (komunidade) telefone polísia to’o iha fatin akontesementu maibé ita la kontribui informasaun para polísia bele halo kaptuasaun lori ema sira ne’e ba tuir prosesu. Entaun, difisil ba polísia atu deskobre sé maka sai suspeitu ba kazu ne’e,” Hornay ba jornalista sira iha Palásiu Prezidente Nicolau Lobato, Bairru Pité, kinta (17/1), hafoin relata situasaun seguransa ba Prezidente Repúblika, Francisco Guterres Lú Olo.

Nia haktuir, Sekretáriu Estadu Seguransa Sivíl dezloka ona ba Munisípiu Baucau atu halo inkontru ho Komandante Polísia Munisípiu Baucau para bele hatene di’ak liu kazu ne’e akontese oinsá.

Komandante Jerál PNTL ne’e informa katak akontese átu krime asidente no insidente iha semana ida nia laran maka hanesan kazu asidente hamutuk 25 itál kazu, ne’ebé la rezulta ema ruma mate maibé kanek de’it no agora hala’o hela tratamentu iha ospitál nasionál.

Nune’e mós, nia hatutan, kazu insidente ne’ebé akontese hamutuk 45, liu-liu kazu ofensa integridade simplis maka domina.

Hornay esplika, kazu asidente ne’e akontese tanba fatór umanu liu-liu tanba lanu, matan dukur, ladún kuida án, seidauk iha karta kondusaun maibe obriga án lori kareta. “Ita apela ba komunidade liu-liu ba kondutór sira karik halo viajen ruma, tenke tau prioridade ba pasajeiru sira nia vida duké osan,” nia tenik.

Kona-ba insidente, nia esklarese, insidente ne’e akontese tanba komunidade nia konsiénsia atu halo tuir lei ne’e maka sei mínimu no dalaruma hatene hela risku hosi insidente ne’e maibé hakarak halo nafatin.

“Ita nia konsiénsia sei fraku oituan. Karik ita hotu-hotu senti katak ita nu’udar timoroan, mai ita asegura estabilidade no pás para átu sira ne’e labele mosu,” nia apela.

Nia haktuir, Prezidente Repúblika orgullu ho serbisu entre PNTL no F-FDTL tanba halo koordenasaun ne’ebé di’ak tebes hodi asegura estabilidade.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here