Prezidente PN, Arão Noe, bainhira halo diskursu iha konferénsia internasionál ba selebrasaun tinan 21 deklarasaun universál demokrasia ne’ebé organiza hosi Parlamentu Nasionál iha salaun ministériu finansa. Imajen António Goncalves

DILI (TATOLI) –Prezidente Parlamentu Nasionál, Arão Noé, deside suspende Memorandum of Understanding (MoU) ka nota entendimentu ne’ebé antes asina ona hosi Sekretáriu Jerál Parlamentu Nasionál, Adelino Afonso de Jesus ho Managing Director & CEO, Dr.h.c Gaurav Rekhi hosi ManipalHospital Malaysia, tanba konsidera ilegál basa MoU ne’e nia prosesu la liu administrativu ida formal.

“Ha’u konsidera akordu ne’ebé hetan asinatura ona, ne’e illegal tanba aktu la liuhosi prosesu administrativu ida formál. Entaun sei haruka hapara ka suspende hodi hein desizaun loloos tuir regra,” Prezidente Parlamentu Nasionál (PPN) Arão Noé ba jornalista sira iha parlamentu, ohin.

Arão konta asinatura ba akordu ne’e la iha koñesimentu ida ba nia nu’udar Prezidente PN. “Ha’u la iha informasaun. Tanba ne’e, sé mak halo ida ne’e tenke responsabiliza.”

“MoU ne’e lori parlamentu nia naran, mezmu dehan parlamentu mak asina ho ManipalHospital, maibé tenke iha dokumentu ofisiál hafoin bele asina. La’ós tanba desizaun iha Konsellu Administrasaun ka la iha dokumentu ofisiál mak ita konvida ema mai asina, enkuantu la iha baze legál,” Prezidente PN esklarese.

Arão Noé, preokupa dokumentu ofisiál seidauk iha, la hatene katak bazeia ba saida mak konvida ona ema mai asina.

“Ida ne’e mak ha’u nia pergunta, loloos Prezidente Parlamentu hatún ona despaxu hafoin SekJer (Sekretáriu Jerál PN, Adelino Afonso de Jesus) bele ezekuta no asina ho parseiru sira,” PPN husu e konsidera problema interna, maibé akordu ne’e tenke la’o tuir regra, importante tenke prienxe kritériu administrativu nian, labele ansi los hodi asina.

Nia fó hanoin hikas katak, iha tinan kotuk (2018), 24 Dezembru, komisaun konkorda ona, maibé normalmente tenke iha uluk akta reuniaun konsellu administrasaun aprova hafoin iha fali despaxu ida hosi lider másimu parlamentu  nian liuhosi asinatura, nune’e bele autoriza ba prosesu asinatura nota entendimentu.

Notísia relasionadu : http://www.tatoli.tl/2019/01/la-konfia-hngv-pn-hili-manipalhospital-siloam-atende-saude-deputadu-sira-nian/

Jornalista : Zezito Silva

Editór : Manuel Pinto

1 KOMENTÁRIU

HAKEREK NO HATÁN

Please enter your comment!
Please enter your name here