Diretór Jerál (DJ) Ospitál Nasionál Guido Valdares (HNGV-sigla Portugés), Aniceto Cardoso Barreto. Imajen/Espesiál

DILI (TATOLI)—Diretór Jerál (DJ) Ospitál Nasionál Guido Valdares (ONGV),  Aniceto Cardoso Barreto, relata ospitál nasionál iha rekursu atu atende pasiente sira ho adekuadu, la diferente ho nasaun boot sira seluk hanesan Malaysia, Singapura no seluk tan.

“Rekursu ospitál nia sufisiente atu halo atendimentu ba pasiente sira ho adekuadu, la diferente ho nasaun boot sira seluk hanesan Malaysia, Singapura no seluk tan. labele fó sai informasaun arbiru, enkuantu seidauk iha informasaun ne’ebé loloos,” Diretór Jerál ONGV ba jornalista sira liuhosi konferénsia imprensa iha sala konferénsia, Ospitál Nasionál, ohin.

Nia sujere administrasaun parlamentu hakarak fó sai estetmentu ruma, di’ak liu tetu uluk, konfirma hodi justifika atu bele hetan informasaun loloos, nune’e labele kria fali dezentendimentu entre ministériu saúde liuliu pesoál saúde sira.

Aniceto relata Moras grave liu, hanesan moras kankru, moras korasaun no fase ran nian mak ONGV bele halo transferénsia ha rai li’ur.

“Iha asuntu importante tolu mak Ospitál Nasionál Guido Valadares tau iha kestaun, hanesan pasiente sira moras ho númeru aas liu mak kankru, korasaun no fase ran, hanesan membru parlamentu, Mateus de Jesus (matebian) iha 2016, sofre moras kankru, ospitál trata hodi haruka ba Singapura hodi kontinua halo tratamentu durante fulan tolu to’o neen, maibé la konsege salva,” Diretór Jerál ONGV fó hanoin fali.

Tuir Diretór Jerál ONGV, mate ne’e buat ida destinu, tanba mundu ne’e mak ema la mate entaun bele nakonu. Maibé pesoál saúde tenke hatene kauza mate atu nune’e bele halo korresaun.

Ho ida ne’e, governu konstitusionál liu hosi Ministériu Saúde, iha tinan ne’e estabelese unidade onkolojia ba kankru nian.

Ba moras korasaun nia, ONGV foin enkontru ho ManipalHospital ne’ebé asina ona akordu ho parlamentu atu suporta nune’e bele estabelese unidade korasaun.

Enkuantu remodealista ka fase ran nian, ONGV iha ona mákina haat ne’ebé to’o mai ona, nune’e mós iha 2020 to’o 2022 loke tan unidade fase ran iha Baukau ho Maliana hodi bele halo tratamentu ba pasiente sira iha ne’ebá.

Nia mós relata, durante ne’e pasiente hanesan membru parlamentu barak mak mai iha ospitál ida ne’e no konsege salva, kuaze espesialista sira kontrola durante oras 24 nia laran. “maibé hosi hirak ne’e ha’u labele mensiona nia naran.”

Notisia Relasiona :

  1. http://www.tatoli.tl/2019/01/ppn-suspende-mou-ho-manipalhospital-malaysia/
  2. http://www.tatoli.tl/2019/01/la-konfia-hngv-pn-hili-manipalhospital-siloam-atende-saude-deputadu-sira-nian/

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here