Prezidente Konsellu Administrasaun Radiu Televizaun Timor-Leste, Emprensa Públika (RTTL, E.P), Gil da Costa, bainhira halo diskursu iha serimonia tomada pose iha Palásiu Governu, ohin. Foto António Goncalves

DILI, (TATOLI) – Eis-Prezidente Konsellu Administrasaun Radiu Televizaun Timor-Leste, Emprensa Públika (RTTL,EP), Gil da Costa Naldo Rei, hateten simu ezonerasaun ne’ebé ezekutivu halo ba nia.

“Nu’udar ema rezisténsia, ha’u lakohi sai vítima iha instituisaun ida. Ho fuan boot ha’u simu buat hotu ne’ebé akontesse, no ha’u iha ne’e atu hatudu kualidade profesionalizmu”, tenik hafoin partisipa toma pose Prezidente Konsellu Administrasaun RTTL, EP foun, Francisco da Silva Gary, iha Palásiu Governu, ohin.

Nia dehan durante lidera instituisaun Estadu ne’e, nia sempre hakoak ema hotu, nunka haree ba kor partidu no sempre defende independénsia editoriál, mesmu nune’e intervensaun polítika konsege ezonera nia.

“Intervensaun polítika konsege ezora ha’u, maibé ha’u aseita de’it, tamba ezonera ha’u no falun ha’u iha irregularidade no má administrasaun. Ha’u hakarak hatudu provas”, katak.

“Ha’u mós hakarak prezidente agora, ne’ebé mak lidera auditoria interna no troka ha’u, dehan intensaun husi auditoria ne’e saida. Maske nune’e ha’u ho fuan boot, nu’udar ema rezisténsia ha’u sempre defende lia loos”, katak.

Nia akresenta iha nia profesionál kareira to’o agora nunka simu situasaun ne’e, no ida ne’e primeira-vez simu.

“Kuandu ódiu no vingansa polítika, labele hasoru ho ódiu no vingansa polítika, tenke simu ho fuan boot hodi ita bele dezenvolve rai ne’e ba oin. Sé mak tun ohin laiha problema, más instituisaun Estadu tenke la’o ba oin, tanba ne’e tenke reforsa instituisaun para labele iha intervensaun polítika iha RTTL,ep”, dehan tan.

Tuir nia RTTL,ep tenke independente, inparsiál, kredível, faktuál no hatudu ba públiku katak instituisaun ne’e mak sei sai roman ba povu tomak.

“Labele inklina ba partidu no grupu atu fó informasaun ba públiku bazea ba inklinasaun”, katak.

Entretantu Gil da Costa hetan ezonerasaun liuhosi reuniaun Konsellu Ministru iha loron 9 janeiru, no iha tempu hanesan nomeia Francisco da Silva Gary.

Gil da Costa hetan nomeasaun husi VII Governu liuhosi reuniaun Konsellu Ministru iha loron 25 janeiru 2018 no hetan tomada pose iha loron 1 fevereiru 2018, no nia la konsege kumpre mandatu to’o remata tinan haat.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here