Primeiru-Ministru, Taur Matan Ruak. Imajen Antonio Goncalves

DILI (TATOLI)—Primeiru-Ministru (PM), Taur Matan Ruak, hateten proposta alterasaun Lei Atividade Petrolífera (LAP) ne’ebé Parlamentu Nasionál haruka hikas ba Prezidente Repúblika, ida ne’e Prezidente Repúblika sei promulga.

Tanba ne’e , nia dehan, Governu seidauk foku kona-ba fundu impréstimu ne’ebé foin lalais Xefe Negosiadór Delimitasaun Fronteira Marítima, Kay Rala Xanana Gusmao planeia atu sosa asaun Conoco Philips no Shell Energy bainhira iha impedementu ba sosa asaun.

“Agora Governu sei foku lai ba orsamnentu jerál Estadu (OJE) 2019 tanba osan ne’ebé atu sosa asaun ne’e iha tiha ona OJE no OJE sei iha Prezidente nia liman, tan ne’e hein promulgasaun ka veto,” Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba atividade Governu no OJE 2019.

Kona-ba OJE, Taur esplika, Prezidente Repúblika iha prazu loron 30 atu estuda orsamentu jerál Estadu (OJE) 2019 no prazu ne’e sei to’o iha loron 24 Janeiru.

Tuir nia katak Prezidente Repúblika sei toma desizaun tuir nia kompeténsia rasik, entaun janeiru nia laran sei kobre ho orsamentu duo-désimu atu selu saláriu, bens no serbisu nomós transferénsia públika.

“Ne’e valór ki’ik. Ita hein to’o OJE 2019 Xefe Estadu veta ka promulga, ne’e maka ita foin haree pasu saida maka ita sei halo iha tempu oin mai haree. Se agora ita siik de’it ka espékula de’it ne’e ladún di’ak. Pior liu ita tau fali liafuan ne’ebé Prezidente la hanoin maibé tau fali ba iha nia ibun, ne’e ladún di’ak,” Taur tenik.

Ihan biban ne’e, Primeiru-Ministru mós hato’o ba Prezidente Repúblika relasiona ho atividade Governu nian liu-liu atu tau matan ba vítima dezastre naturais ne’ebé akontese nomós problema konfrontasaun entre joven ne’ebé akontese iha Baucau oinsá Komandante PNTL halo esforsu atu hakalma situasaun.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here