Primeiru Ministru, Taur Matan Ruak.

DILI (TATOLI)—Primeiru-Ministru, Taur Matan Ruak, afirma katak Governu ezije aviaun hotu-hotu ne’ebé halo operasaun iha Timor tenke ho kondisaun di’ak.

“Ita-nia ezijénsia maka aviaun hotu-hotu ne’ebé mai opera iha ita-nia rain tenke iha kondisaun di’ak. Dalan di’ak maka mantein diálogu ho Kompañia sira hodi aprezenta ita-nia preokuasaun,” Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, relasiona ho aviaun Sri Wijaya ne’ebé foin lalais ho kondisaun ladún di’ak halo pasajeiru sira sai pániku.

Nia hateten, ko’alia kona-ba seguransa, Governu ne’e tenke preokupa duni tanba akontese kazu dala rua ona ba Sri Wijaya.

“Ha’u autoriza ona Ministru Transporte no Komunikasaun para bele vizita ba Indonézia atu aprezenta preokupasaun ba Indonézia para kompañia sira ne’ebé mai opera iha ita-nia rai tenke ho kuidadu,” Taur haktuir.

“Ita-boot sira hatene katak ita laiha aviaun rasik. Aviaun ne’e ema nian. Tanba ne’e maka ita tenke ko’alia ho ema ne’ebá,” nia hatutan.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here