Irigasaun Tono

DILI (TATOLI)-Mota-boot tanba impaktu husi udan-boot estraga kanál Irigasaun Kay Rala Xanana Gusmão, iha Aldeia Oebaba, Suku Raimea, Postu Administrativu Zumalai, Munisípiu Covalima, ne’ebé mak oferese bee ba natar hektar atus lima.

Tanba ne’e, komunidade suku refere husu ba governu liuhusi Ministériu Agrikultura no Peska (MAP) atu atende lalais problema ne’ebé mak sira hasoru tanba agora dadaun tempu ona komunidade iha área refere komesa atu halai natar.

Xefe Aldeia Raimea, David Ferreira hateten liuhusi telemovel iha tersa, (15/01) katak nu’udar lider komunitáriu hakarak hato’o ba governu atu haree lalais Irigasaun Kay Rala Xanana Gusmão ne’ebé hetan estragu husi udan-boot ne’ebé akontese iha loron hirak liubá.

Nia informa udan-boot ne’ebé akontese halo mota sobu irigasaun, sai hanesan ameasa boot ba komunidade nia natar totál hektar 500 ne’ebé irigasaun ne’e fornese bee ba. Tinan ida ne’e sira labele halo natar tanba problema husi irigasaun ne’e rasik. Ne’e duni, sira husu ba MAP atu rezolve lalais irigasaun ne’e tanba agora ne’e tempu ona halo natar.

“Tinan ida ne’e, ami labele halo natar no tinan oin mós ami labele halo tanba bareira husi irigasaun monu no halai hotu. Agora dadaun, ami komunidade ne’ebé halo natar iha inisiativa rasik hodi taka lori rai-henek ho materiál manuál,” lamenta Xefe Aldeia, David Ferreira.

Iha fatin hanesan, Prezidente Asosiasaun Oebaba, Guilherme de Deus, hakarak hato’o ba Diresaun Nasionál Irigasaun, MAP, atu fó apoiu emerjénsia ba sira iha tempu badak tanba irigasaun Kay Rala Xanana Gusmão hetan estragu tebes husi inundasaun ne’ebé mak akontese iha loron hirak liubá.

“Agora dadaun komunidade sira lori materiál manuál taka hela irigasaun ne’ebé sobu husi udan-boot. Ami-nia kbiit no forsa la to’o tanba ne’e ami husu ba estadu bele ajuda no apoiu ami hanesan ekipamentu loder ou eskavadór hodi suru rai-henek ne’ebé taka hela kanál irigasaun,” ejize Guilherme de Deus.

Nune’e mós, Administradór Postu Administrativu Zumalai, Santiago Barreto hateten, nu’udar administradór nia preokupasaun, simu no sente ejizénsia husi komunidade sira nian. Ne’e duni, hakarak hato’o ba nasionál oinsa mak bele fó apoi urjente ba problema ne’e tanba agora tempu ba komunidade sira halo natar.

Hatan ba preokupasaun ne’e, Diretór Nasionál Irigasaun, Martinho Lauretinho Soares hateten, tuir komunikadu ida ba Ajénsia TATOLI, ohin, katak iha semana kotuk sira iha enkontru ida ho diretór jerál sira no sira hasoru diretamente ona Ministru Agrikultura no Peskas no sira mós prepara ona pedidu balun hodi hato’o ba ministru hodi hato’o iha Konsellu-ministru karik bele aprova osan ruma hodi bele aloka orsamentu emerjénsia ruma atu bele atende lalais irigasaun sira hanesan Irigasaun Kay Rala Xanana Gusmão, Irigasaun Bluto, Irigasaun Uatolari inklui Irigasaun Moleana.

“Ami aprezenta hotu ona ba ministru hodi nune’e ita bele atende irigasaun ne’ebé agora dadaun ne’e hetan afeta ka sobu husi mota. Kestaun tamna osan la iha, mina mós la iha, ita atu haruka operadór sira atu ba iha ne’e ba presiza han. Kona-ba makina sira ne’ebé atu ba halo operasaun iha kampu dezde tinan uluk kedas ami fó hanoin, ami presiza osan ba halo manutensaun ba makina sira ne’e tanba makina sira ne’e, eskavadór, tronton ne’ebé tula ita-nia makina sira ne’e ba mai aat hotu ona,” klarifika Diretór Martinho Soares.

Nia esplika, ita la iha makina tau iha munisípiu, eskavatór lima, konsentra iha armajen Metinaro. Ne’e duni kuandu tempu udan, ida ne’ebé mak presiza tula ba. Agora atu tula ne’e kestaun mak kareta tronton rua de’it. Kareta refere hola iha tinan 2009-2010. Kareta refere aat hotu ona.

Durante ne’e, diresaun tau osan ba proposta hodi halo manutensaun ba kareta sira ne’e maibé osan la iha.

“Ita-nia makina sira agora kondisaun aat hotu ona. Atu halo manutensaun de’it mós osan la iha no makina sira ne’e mós tuan hotu tanba kuaze tinan sanulu resin no agora dadaun mós ita la iha kombustível. Problema hirak ne’e ami hato’o ona ba ministru MAP atu nune’e bele hato’o iha Konsellu-ministru hodi nune’e bele aprova pedidu refere. Karik Konsellu-ministru aprova osan, entaun ami bele halo esforsu hodi bele rezolve iha tempu badak,” refere Diretór iha komunikadu ne’e.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here