SEKOMS akompañadu ho Xefe Gabinete no Asesór enkontru kortezia ho embaixadór Kuba ba Timor-Leste, Oscar Coet Blackstock, ohin. Foto TATOLI: Egas Cristovão

DILI, (TATOLI) – Governu Kuba liuhusi nia embaixadór iha Timor-Leste konvida governu liuliu Sekretáriu Estadu Komunikasaun Sosiál (SEKOMS) atu partisipa iha konferénsia internasionál ne’ebé liga ho Rede Rádiu no Televizaun Internasionál (RRTI) ida ne’ebé sei akontese iha Havana-Kuba iha fulan-juñu tinan ne’e.

Embaixadór Kuba iha Timor-Leste, Oscar Coet Blackstock, ba jornalista sira katak Estadu no governu Kuba konvida TL tanba iha relasaun ne’ebé forte, tan ne’e buka hakbesik án nafatin ho lider timoroan sira oioin.

Embaixadór Kuba iha Timor-Leste, Oscar Coet Blackstock

“Istorikamente ita iha relasaun ne’ebé besik liu. Ba Kuba, ida ne’e normál atu hakbesik ba lider sira oioin nasaun ne’e (Timor-Leste) nian, haktuir ba fraternidade. Ida ne’e normál hodi hakbesik án ba malu personalmente”, dehan Oscar Coet Blackstock iha gabinete SEKOMS, Palásiu Governu, dader ne’e.

Iha biban hanesan, Sekretáriu Estadu Komunikasaun Sosiál, Merício Juvinal dos Reis Akara, haktuir durante sorumutu kortezia ne’e ko’alia asuntu importante rua; Kuba konvida governu, liuliu SEKOMS no seluk mak ko’alia kona-ba rádiu komunidade timoroan sira, ne’ebé SEKOMS apoiu hela.

SEKOMS konsidera Kuba iha esperiénsia atu dezenvolve rádiu komunidade, oinsá uza rádiu hanesan meius komunikasaun ne’ebé mak efetivu atu transmite informasaun ba sidadaun nomós fasilita informasaun sidadaun ba Estadu.

“Entaun esperiénsia sira ne’e, ohin ami ko’alia para ba oin bele iha mós kontinuasaun  em termos de fahe esperiénsia, dezenvolve mós rádiu komunidade. Apoia malu. Iha pontus rua ami ko’alia relasiona ho meius komunikasaun sosiál”, katak tan.

Relativamente konvite Kuba nian ba governu, governante ne’e katak sei tau iha konsiderasaun hodi partisipa.

“Ami konsidera katak eventu internasionál importante tanba liga ho esperiénsia internasionál kona-ba Rede Rádiu no Televizaun, entaun ohin ha’u dehan ona ba embaixadór Kuba katak obrigadu i teknikamente, ami-nia ekipa tékniku iha ne’e, liliu xefe gabinete sei kontaktu no kontinua kontaktu embaixadór Kuba iha ne’e para bele fasilita prosesu i juñu parte Sekretáriu Estadu Komunikasaun Sosiál konkorda atu ba partisipa”, konklui.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here