Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu liuhosi Konsellu Ministru, ohin diskute nota entendimentu ho governu Indonézia mak hanesan metrolojia, klimatolojia no jeofizika, buska no salvamentu aéreu no marítima nomós akordu kona-ba padraun internasionál no prátika ne’ebé rekomenda hosi Konvensaun Chicago (aviasaun sivíl).

Ministru Reforma Lejizlativa no Asuntu Parlamentár (MRLAP), Fídelis Leite Magalhães, ba jornalista sira iha Palásiu Governu ohin, hateten Ministru Transporte no Komunikasaun (MTK), José Agostinho, aprezenta nota entendimentu ne’e.

Akordu dahuluk mak MTK ho ajénsia metrolojia, klimatolojia no jeofizika Indonézia hodi haree ba dezenvolvimentu iha área refere.

Daruak mak ho ajénsia basionál buska no salvasaun Indonézia atu oinsá salva no hametin kooperasaun no servisu hamutuk iha buska no salvamentu aéreu no marítima ne’ebé fó dalan hodi troka lalais no regula infromasaun ba kazu ezisténsia ka posibilidade ba perigu ruma.

Asaun konjunta ba buska no salvamentu, fahe mós koñesementu no meius tékniku no formasaun.

Memorandum ikus entre governu rai rua mak delegasaun kompeténsia servisu tráfegu aéreu nomós akordu dever sira kona-ba padraun internasionál no prátika ne’ebé rekomenda hosi konvensaun Chicago.

“Konsellu Ministru delega kompeténsia ba ministru transporte no komunikasaun ho koordenasaun ho ministériu relevante ba diskusaun no asinatura ba memorandu tolu ne’ebé hatete iha leten durante ninia vizita iha Jakarta ne’ebé mak hala’o iha loron 21 no 22 fulan-janeiru”, katak Fídelis.

Sorumutu ne’e, governu mós halo apresiasaun ba proposta kooperasaun hosi Banku Dezenvolvimentu Áziatiku (ADB-sigla inglés) ho Eletrisidade Timor-Leste (EDTL) hodi hametin sistema eletrisidade nasionál liuhosi redusaun ba kustu produsaun, aumenta reseita, reforsa prestasaun servisu ho kualidade, reforma institusionál nomos kapasitasaun ba rekursu umanu.

“Planu ne’e ho objetivu hadi’a EDTL ho hanoin ba tempu naruk hodi nakfilak EDTL ba empreza públika ida para presta servisu ho efisiente liu ba populasaun no hadi’a sistema no jestaun”, katak governante ne’e.

Governu rekomenda ba MOP hodi esplora detallu ho ADB kona-ba kooperasaun ne’e rasik antes estabelese akordu ba implementasaun.

Alende ne’e, MRLAP mós aprezenta proposta rezolusaun governu kona-ba polítika reforma lejislativa ba kontinuasaun implementasaun ho kualidade, sistematizada, asésivel ba sidadaun hotu hanesan tuir prioridade governasaun no hetan aprova hosi Konsellu Ministru.

Nuneé mós aprova proposta kona-ba polítika reforma judisiáriu ne’ebé konsidera iha programa governu da-ualu estabelese konsolidasaun iha setór justisa ne’ebé iha importansia fundamentál ba konstrusaun Estadu.

Reforma setór ne’e sai fatór importante hodi transmite konfiansa hodi atrai investidór hodi investe no dezenvolve ekonomia nasaun.

Ikus liu maka Primeiru-Ministru, Taur Matan Ruak, aprezenta proposta rezolusaun Governu no aprova hosi KM hodi define vaga ba konkorsu promosaun kareira rejime jerál ba funsionáriu públiku iha Komisuan Funsaun públika ba 2019.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here